Այսօր լրագրողների հետ հանդիպմանը Գրողների միության քարտուղար, ՀՀ մշակույթի նախարարության գրքի և հրատարակչության կենտրոնի ղեկավար, գրող Էդվարդ Միլիտոնյանը խոսեց ժամանակակից մանկապատանեկան գրականության մասին:
Ըստ նրա` այս ժանրը վտանգի առջև է, քանի որ սերունդը չի հետաքրքրվում մանկագրությամբ: Է. Միլիտոնյանը անդրադարձավ Հայաստանում մանկապատանեկան գրականության պատմությանը`նշելով, որ հիմնադիրներն են Ղազարոս Աղայանը և Հովհաննես Թումանյանը:
«Սա չի նշանակում, որ մինչ դա չեն եղել մանկագիրներ: Վերջին հարյուր տարվա ընթացքում է, որ Հայաստանում ուշադրություն են հատկացրել հատուկ երեխաների և պատանիների համար գործեր ստեղծելուն: Շատ ուշագրավ ստեղծագործություններ են եղել. Դերենիկ Դեմիրճյանի «Քաջ Նազարը», Սուրեն Մուրադյան, Պատվական Խաչատրյան, Ազատ Շահինյան»,- մեկնաբանեց Է. Միլիտոնյանը`շարունակելով թվարկել` Երվանդ Պետրոսյան, Լիպարիտ Սարգսյան, Ղուկաս Սիրունյան, Ռոլանդ Շառոյան:
Գրողի կարծիքով` այժմ դժվար պահ է. մահացան ավագ տարիքի մանկագիրներր: «Մի սերունդ է գալիս, որը հատուկենտ է ստեղծում: Մեկ երկու անուն կա, բայց մեզանից հետո վտանգ եմ տեսնում, որովհետև երիտասարդ գրողների համար այս ժանրը շատ բարդ է. պետք է չափը պահպանել, հանգավորել և երեխայի հոգեբանությունը հաշվի առնել, որը Աստծո պարգև է»,- մեկնաբանեց Է. Միլիտոնյանը` հավելելով, որ շատ մեծ նկարիչներ վերադարձան այդ մտածողությանը:
Գրողի համոզմամբ`այսօր մեր երեխաների լեզվամտածողությունը խեղվում է, ժարգոնը գրավել է երեխաների ուղեղը: «Եթե ապագայում մարդասպանների, խուլիգանների թիվն ավելանա, ուրեմն ես ճիշտ էի: Հասարակության ուշադրությունը պետք է սևեռենք լավ ստեղծագործությունների վրա»,- հորդորեց Է. Միլիտոնյանը:
Նա լրագրողներին տեղեկացրեց, որ տարիներ առաջ մանկական գրքերի հրատարակության համար հատկացվում էր 15 մլն, իսկ վերջին տարիներին` 10-11 մլն: Ամեն տարի տպագրվում է 30-50 մանկապատանեկան գիրք` հինգ հարյուր օրինակով:
