Իրանական Mehr News լրատվական գործակալության փոխանցմամբ՝ Ռուսաստանն ու Ադրբեջանը հայտարարել են Իրանի հյուսիսում ընկած Ռեշտ-Աստարա երկաթուղու 75 կիլոմետրանոց հատվածի կառուցմանը մասնակցելու իրենց պատրաստակամության մասին։ Այս մասին հայտարարել է Իրանի երկաթուղու միջազգային հարաբերությունների գծով տնօրեն Աբաս Նազարին։
Վերջինիս խոսքերով՝ կողմերը մտադիր են հանդիպել հաջորդ ամիս՝ քննարկելու 400 միլիոն դոլար արժողությամբ այս նախագծի իրագործումը։ Նախագիծն իրականացվելու է երկու տարվա ընթացքում։
Սկզբնական շրջանում Ռեշտ-Աստարա երկաթուղու տարեկան հզորությունը հասնելու է 6 միլիոն տոննայի, սակայն հետագայում այն հասցվելու է մինչև 20 միլիոն տոննայի։
Հիշեցնենք, որ ներկայումս Ռուսաստանը տարեկան 20 միլիոն տոննա բեռ է փոխադրում դեպի Հնդկաստան։ Այս նախագծի իրագործման դեպքում ռուսական բեռները Հնդկաստանում կհայտնվեն Իրանի տարածքով, ինչը 30 տոկոսով կնվազեցնի տրանսպորտային ծախսերը։