Աբխազիայի նախագահ Սերգեյ Բաղապշը եվրոպական կառույցներին և ԱՄՆ-ին, որոնք պաշտպանում են Վրաստանի տարածքային ամբողջականությունը, մեղադրել է կողմնապահության մեջ և հայտարարել, որ Սուխումը «էապես կվերանայի իր դիրքորոշումը»: «Մենք տեսնում ենք Վրաստանին աջակցելու ուղղությամբ եվրոպական կառույցների` քաղաքական առումով չմտածված, կողմնակալ գործողությունները` չնայած այն ողբերգական իրադարձություններին, որոնց մեղավորը վրացական կողմն էր»,- ասել է Բաղապշը, հայտնում է РИА Новости-ն: Նա նշել է, որ «վերջերս վրաց-աբխազական կարգավորման շուրջ ստեղծվող մթնոլորտը՝ կապված Վրաստանի նախագահ Սաակաշվիլիի ուղերձին եվրոպական քաղաքական կառույցների և ԱՄՆ-ի Սենատի արձագանքի հետ, Աբխազիային հարկադրում է էապես վերանայել իր դիրքորոշումը»:
Սուխումի ԶԼՄ-ները հաղորդում են, որ Բաղապշը Հարավային Կովկասում Եվրամիության հատուկ ներկայացուցիչ Փիթեր Սեմնեբիին իրազեկել է մոտ ժամանակներս Ինգուրի գետի երկայնքով «լիարժեք սահմանային ենթակառուցվածքի ստեղծմանը» ձեռնամուխ լինելու մտադրության մասին:
Բաղապշը նաև Եվրամիության առաքելության հետ շփումների ընթացքում վերահաստատել է Սուխումի դիրքորոշումը Թբիլիսիի խաղաղ նախաձեռնությունների նկատմամբ` հայտարարելով, որ Աբխազիան չի վստահում Վրաստանի նախագահի ուղերձին և պնդում է, որ միջազգային երաշխիքների տրամադրմամբ, ռազմական գործողությունների չվերսկսման մասին համաձայնագիր ստորագրվի: