Սեպտեմբերի վերջին մեծ աղմուկով վնասազերծված բանդայի գործով կալանավորված «Գառնիի Սուրիկի լավաշ» ընկերության սեփականատեր Սուրիկ Հակոբյանի երկու որդիների և հարսի գործերի քննությունը որևէ կերպ առաջ չի գնում: Այս մասին «Առաջին լրատվական»-ի հետ զրույցում նշեց «Գառնիի Սուրիկի լավաշ» ընկերության սեփականատեր Սուրիկ Հակոբյանը, որին, ըստ մամուլում շրջանառվող տեղեկությունների, ստիպում են հրաժարվել իր բիզնեսից:
– Պարոն Հակոբյան, մամուլում տեղեկություն է տարածվել, թե ձեզանից պատրաստվում են խլել Ձեր արտադրամասը: Ինչքանո՞վ են այդ լուրերը համապատասխանում իրականությանը:
– Նման բան չկա, ինձ էս ընթացքում անհանգստացնող կամ էկող-ասող չի եղել: Երկրորդն էլ` հո ամեն ինչ այդքան հեշտ չի ստացվում, ուրիշներն էլ են արտադրում լավաշ, բայց դե ոչ մեկը չի կարողանում նմանացնել իմ հացին: Բայց դե, նման բան չկա, որևէ մեկը ինձ չի նեղացրել: Ես հո միոտանի ռուս չեմ, որ կարողանան մտածել, թե իմ գործի հետ ինչ ուզենան կարող են անել: Իմ աշխատանքը իմ տարիների չարչարանքն է, ավելին` այդ գործարանն իմ սեփականությունն է, ո՞վ կարող է դա իմ ձեռքից վերցնել, ո՞վ կարող է իմ սեփականության նկատմամբ ոտնձգություն անել:
– Իսկ Ձեր որդիների գործի քննությունն ի՞նչ ընթացքի մեջ է:
– Որդիներս ոնց կային, ընենց էլ մնացել են: Ես անգամ գնացի Ալիկ Սարգսյանի մոտ, էն ժամանակ ինքը նախարար էր: Ինքն ինձ շատ ջերմ ընդունեց, ինձ ընդունեց որպես ծնող, ասեց, որ ես իր ծնողի հասակին եմ ու ինքն ինձ հարգում, սիրում է: Ալիկ Սարգսյանը խոստացավ, որ փոքր որդուս բաց կթողնի, բայց դե չանցած երկու օր իրան հանեցին, չգիտեմ էլ տեղափոխեցին, թե հանեցին, էդ էլ չհասկացա: Հիմա էլ ուզում եմ գնամ Գասպարյան Վովայի մոտ: Դժվար է, մի ընտանիքից երեք հոգու կալանվորել են, թոռներիս հարցերին չգիտեմ ինչ պատասխանեմ: Երբ ընդունեց Գասպարյան Վովան, կգնամ մոտը, ինձ երևի կընդունեն, որովհետև ես առաջավոր աշխատող եմ, գյուղի ժողովուրդ եմ աշխատեցնում: Գառնի գյուղի 2000 բնակիչ ինձ համար ստորագրություն է հավաքել, ներկայացրել եմ Սերժ Սարգսյանին ու դատախազություն:
– Փաստորեն, որևէ փոփոխություն գործի քննության ընթացքում այս ժամանակահատվածում չի՞ արձանագրվել:
– Բացարձակապես, ոստիկանության աշխատողները մեր տնից ահագին առարկաներ են տարել, ասենք՝ նկարներ, որոնք ինձ համար սրբություն են, հարսիս ոսկիներն են տարել, բայց մինչ օրս ոչ կանչում են, ոչ հարցնում են: Թող գան տեսնեն ես ոնց եմ ապրում, այսքան ժամանակ աշխատում եմ, չեմ կարողացել իմ տունը կարգին վերանորոգեմ, ուրիշները պալատներ են սարքում: Մի հատ չեն կանչում հարցնեն, թե տղաներդ նման բան են արել, դու գիտե՞ս:
– Պարոն Հակոբյան, Դուք Գառնիի ԲՀԿ տարածքային կառույցի ղեկավարն եք և նշել էիք, որ Ձեր որդիների հարցով դիմել եք նաև ԲՀԿ առաջնորդ Գագիկ Ծառուկյանին: Նրա հետ հանդիպումը Ձեզ ի՞նչ տվեց:
– Դե, մեկ անգամ հանդիպել եմ, Գագիկ Ծառուկյանն ասեց` ոչինչ, սպասիր, քննությունը կպարզի: Նման խոսակցություն է եղել ընդամենը:
– Իսկ Ձեզ չե՞ն խոստացել, որ որևէ կերպ կմիջնորդեն, կօգնեն:
– Չէ, ի՞նչ միջնորդեն, հիմա էս երկրում ով կարող է մեկը մյուսի համար միջնորդի: Արդեն երկու ամիս է անցել, ու կալանքը նորից երկու ամսով երկարացրել են: Ու էս ընթացքում ինձ մեկ անգամ չեն կանչել, վերջը քննչական վարչություն գոյություն ունի, վարչության պետ գոյություն ունի, տեղակալներ գոյություն ունեն: Ես նախագահին բողոք էի գրել, էնտեղից այդ բողոքն ուղարկել են քննչական վարչություն, իսկ սրանք էլ միայն գրել էին, թե ստացել են իմ բողոքը ու ուրիշ ոչինչ: Սենց բեսպրիդել չի լինի, որ մարդուն չկանչեն ու մի հատ չհարցնեն` այ մարդ, քո երեխեքն ինչ են արել: Եթե ինձ, իմ տարիքին չեն հավատա` Աստված իրենց հետ:
Անժելա Խաչատրյան