Շրջելով Երևանի քրեակատարողական հիմնարկներում` գրող-հրապարակախոս, Հանրային խորհրդի Արցախի հարցերով աշխատանքային խմբի համակարգող Բակուր Կարապետյանը եկել է այն եզրակացության, որ ՔԿՀ-ներում պահվող կալանավորների շուրջ 25 տոկոսը, այսինքն` 4 հոգուց մեկը, իրականում հասարակության համար ոչ մի վտանգ էլ չի ներկայացնում: Այս մասին նա հայտարարեց այսօր կայացած մամուլի ասուլիսում:
Բակուր Կարապետյանի խոսքով` կալանավորների հետ հանդիպումներից ակնհայտ է դարձել այն, որ նրանցից շատերը պատրաստ են սեփական ընտանիքներով տեղափոխվել և բնակվել, ինչպես նաև հանրօգուտ աշխատանքով զբաղվել այն սահմանային բնակավայրերում, որտեղ հարմար կգտնի պետությունը:
Ասուլիսին ներկա «Զորավիկ» թերթի խմբագիր Պուշկին Սերոբյանը իր հերթին նկատեց, որ հասարակությունը շատ բան է կորցնում` քրեակատարողական հիմնարկներում ունենալով իր համար ոչ մի վտանգ չներկայացնող կալանավորներ, շատ դեպքերում մտավորականներ և տնտեսագետներ և այլն:
Շռայլություն է նման մարդկանց մեկուսացնելը, նրանց անձնական և գործնական բոլոր կապերը գտնելը: Այդ մարդկանց մի մասին պետք է ազատ արձակել, նրանց ուղղել դեպի աշխատաշուկա և նրանց միջոցով ամրացնել պետության սահմանները, նկատեց Սերոբյանը:
Ամփոփելով` Բակուր Կարապետյանը տեղեկացրեց, որ Հանրային խորհրդի նախագահ Վազգեն Մանուկյանը հասարակության համար անվտանգ կալանավորներով սահմանամերձ բնակավայրերը բնակեցնելու հարցով պատրաստվում է դիմել պետական այրերին, այդ թվում` նախագահին, վարչապետին և ԱԺ ներկայացուցիչներին: