«168 ժամ»-ի լավատեղյակ աղբյուրների համաձայն` առաջիկայում շարունակվելու են վերջին օրերին ընդհատված պաշտոնանկությունները, և դրանք ներկայացվելու են «նոր լույսի ներքո»:
«Մասնավորապես, այս օրերին իշխանական վերնախավում խոսում են «Օրինաց Երկիր» կուսակցության նախագահ Արթուր Բաղդասարյանի՝ Ազգային անվտանգության քարտուղարի (ԱԽՔ) պաշտոնից ազատման մասին: Ըստ շրջանառվող տեղեկությունների` դա նման է լինելու Աժ նախագահ Հովիկ Աբրահամյանի պաշտոնանկությանը այն իմաստով, որ Բաղդասարյանը հայտարարելու է, թե պաշտոնից հեռանում է ՕԵԿ-ի նախընտրական շտաբի աշխատանքները համակարգելու համար:
Իշխանությունների հաշվարկը հետևյալն է, Արթուր Բաղդասարյանը արդեն ոչ ԱԽՔ պաշտոնում կփորձի փոքր-ինչ ընդդիմադիրի դեր խաղալ, եթե դա ինչ-որ հրաշքով հաջողվի, ՕԵԿ-ը առանձին կմասնակցի ընտրություններին: Եթե ոչ, ինչը շատ ավելի հավանական է, ՕԵԿ-ին 2-3 տեղ կտան ՀՀԿ-ի ցուցակում, և Ա. Բաղդասարյանը կդառնա, ասենք, ՀՀԿ-ի նախընտրական շտաբի պետի տեղակալի տեղակալ: Ինչ վերաբերում է Անվտանգության խորհրդի քարտուղարի նոր հավակնորդներին, ապա դեռևս անուններ չեն նշվում:
Թեև, ինչպես Աժ նախագահի դեպքում, ԱԽ քարտուղար ևս կարող է չնշանակվել: Հայաստանը արդեն գտնվում է նախընտրական փուլում, և բոլոր նշանակումները կատարվում են բացառապես այդ տրամաբանության շրջանակներում: Ուստի ազգային անվտանգության խորհուրդը մի քանի ամիս կարող է նաև նախագահ չունենալ: Առավել ևս, որ Արթուր Բաղդասարյանն էլ չեղածի հաշիվ է»:
