ՀՀ ԱԳՆ–ից «Առաջին լրատվական»–ին հայտնում են, որ նոյեմբերի 21-ին արտգործնախարար Էդվարդ Նալբանդյանը Հաագայում հանդիպում է ունեցել Նիդեռլանդների արտգործնախարար Ուրի Ռոզենտալի հետ:
Ողջունելով Էդվարդ Նալբանդյանին` Ուրի Ռոզենտալը շնորհավորել է Նիդեռլանդներում ՀՀ դեսպանության հիմնադրման կապակցությամբ` վստահություն հայտնելով, որ այն լուրջ ներդրում կունենա երկկողմ հարաբերությունների զարգացման գործում:
Էդվարդ Նալբանդյանն ասել է, որ Հաագայում ՀՀ դեսպանության հիմնումը երկկողմ հարաբերությունների առավել զարգացման, խորացման և ամրապնդման նպատակադրվածության ուղերձ է պարունակում: Նախարարը կարևորել է երկու երկրների միջև քաղաքական երկխոսության ակտիվացմանը, իրավապայմանագրային դաշտի ընդլայնմանը, տնտեսական փոխգործակցության խթանմանն ուղղված համատեղ քայլերի ձեռնարկումը:
Նախարար Նալբանդյանն ընդգծել է, որ Հայաստանը բարձր է գնահատում մեր երկրի զարգացմանը Նիդեռլանդների կողմից ցուցաբերվող աջակցությունն ինչպես երկկողմ ձևաչափով, այնպես էլ միջազգային ֆինանսական կազմակերպությունների` Վերակառուցման և զարգացման եվրոպական բանկի, Արժույթի միջազգային կազմակերպության և Համաշխարհային բանկի շրջանակներում:
Նշելով, որ այսօրվա դրությամբ Հայաստանում գործում է հոլանդական կապիտալով 46 ձեռնարկություն` Էդվարդ Նալբանդյանը համոզմունք է հայտնել, որ համատեղ ջանքերով դրանց քանակը կարելի է առնվազն կրկնապատկել:
Զրուցակիցներն անդրադարձել են նաև Հայաստանում իրականացվող բարեփոխումներին. այս ենթատեքստում Նիդեռլանդների ԱԳ նախարարը բարձր է գնահատել այդ ուղղությամբ Հայաստանի իշխանությունների կողմից իրականացվող քայլերը:
Նախարարները մտքեր են փոխանակել Հայաստանի և Եվրոպական միության հարաբերությունների, Արևելյան գործընկերության ձևաչափում ընթացող համագործակցության շուրջ:
Քննարկվել են երկկողմ հետաքրքրություն ներկայացնող տարածաշրջանային և միջազգային մի շարք հարցեր:
Նույն օրը Էդվարդ Նալբանդյանը ներկա է գտնվել Հաագայում ՀՀ դեսպանության պաշտոնական բացման արարողությանը:
Իր խոսքում Հայաստանի արտգործնախարարը նշել է. «Հայ-հոլանդական առնչությունները գալիս են դարերի խորքից՝ սկսած 4-րդ դարում Սուրբ Սերվանտիուսի կողմից Նիդեռլանդներում քրիստոնեության տարածումից, հայ վաճառականների կողմից Նիդեռլանդներ կակաչի ներկրումից, 360 տարի առաջ Ամստերդամում հայկական տպագրատան հիմնումից, հայերեն լեզվով առաջին Աստվածաշնչի տպագրումից և այս երկրում հայ համայնքի հաստատումից:
Դա եղել է անցյալում, իսկ այսօր Նիդեռլանդներում բացվում է անկախ Հայաստանի դեսպանություն, և բարձրացվում է Հայաստանի դրոշը: Մեր դարավոր հարաբերությունների պատմության մեջ այս օրը մարմնավորում է նոր սկիզբ»:
Նախարար Նալբանդյանը վստահություն է հայտնել, որ դեսպանությունը կարևոր դերակատարություն կունենա բարեկամ Նիդեռլանդների հետ համակողմանի հարաբերությունների խորացման գործում: Խոսելով հոլանդահայ համայնքի մասին` նախարար Նալբանդյանը կարևորել է նրա դերը` որպես երկու ժողովուրդների միջև հարաբերությունների զարգացման յուրահատուկ կամուրջ:
Օրվա երկրորդ կեսին Էդվարդ Նալբանդյանը ՀՀ դեսպանությունում հանդիպում է ունեցել Նիդեռլանդների հայկական համայնքային կազմակերպությունների ներկայացուցիչների հետ, որոնց պատմել է Հայաստանի արտաքին քաղաքականության առաջնահերթությունների ու հիմնական ուղղությունների մասին և պատասխանել նրանց հարցերին:
Հաագայում Էդվարդ Նալբանդյանը նաև հարցազրույց է տվել հոլանդական հեղինակավոր «De Volkskrant» օրաթերթին: Պատասխանելով Հայոց ցեղասպանության միջազգային ճանաչման գործընթացի վերաբերյալ լրագրողի հարցին` Հայաստանի արտգործնախարարն ասել է. «ՀՀ բարձրագույն ղեկավարությունը բազմիցս հայտարարել է, որ Հայոց ցեղասպանության իրողությունը կամ Հայոց ցեղասպանության միջազգային ճանաչման ու դատապարտման կարևորությունը երբեք հարցականի տակ չեն դրվել և չեն կարող դրվել: «1915 թ. վերաբերյալ» պատմաբանների հանձնաժողով ստեղծելու մասին Թուրքիայի արտգործնախարարի հայտարարությունները, փաստորեն, փորձ են հարցականի տակ դնել Ֆրանսիայի, բազմաթիվ այլ երկրների և միջազգային կազմակերպությունների կողմից Հայոց ցեղասպանության ճանաչման փաստը: Դա ոչ այլ ինչ է, քան վտանգավոր ժխտողականության քաղաքականության շարունակություն, ինչի մասին Հայաստանում համապատասխան հստակ հայտարարություն էր արել Ֆրանսիայի նախագահ Նիկոլա Սարկոզին:
Ինչ վերաբերում է Թուրքիայի ԱԳ նախարարի պնդումներին, թե 2005 թ. ՀՀ նախագահին հասցեագրված Թուրքիայի վարչապետ Էրդողանի նամակին այդպես էլ պատասխան չի տրվել, ապա պետք է նշել, որ ՀՀ Նախագահ Ռոբերտ Քոչարյանի պատասխան նամակը ուղարկվել և հրապարակվել է 2005 թ. ապրիլի 25-ին: Թե՛ միջազգային հանրությունը, և թե՛ Թուրքիայում լավատեղյակ են այդ նամակի բովանդակությանը, միգուցե բացառությամբ մի քանիսի, ինչպիսի եզրահանգման կարելի է գալ Ահմեդ Դավութօղլուի հայտարարությունից»:
