Այսօր «Ժառանգություն» կուսակցության առաջնորդ Րաֆֆի Հովհաննիսյանը նամակ է հղել Սերժ Սարգսյանին մի շարք պահանջներով, որոնց կատարման դեպքում միայն հնարավոր կլինի անցկացնել ազատ և արդար ընտրություններ:
ՀՀԿ մամլո խոսնակ Էդուարդ Շարմազանովից փորձեցինք պարզել ՀՀԿ վերաբերմունքը այդ նամակի հանդեպ: Շարմազանովը «Առաջին լրատվական»-ի հետ զրույցում նշեց, որ յուրաքանչյուր քաղաքական ուժ ինքն է որոշում իր գործելակերպը և թե ինչ խնդիրներ բարձրացնի, սակայն, ըստ նրա. «Ինչքան էլ տհաճ լինի Րաֆֆի Հովհաննիսյանի կողմնակիցների համար լսել այդ բանը, սակայն պետք է ասեմ, որ դա նրա հերթական քաղաքական հնարքն է»:
Շարմազանովը նշեց, որ առանց Հովհաննիսյանի նամակի էլ, ՀՀԿ-ն և վերջինիս առաջնորդը շատ լավ գիտեն երկրում առկա խնդիրները, և եթե իրենք ասում են, որ պետք է ամեն ինչ արվի ժողովրդավարության զարգացման համար, ապա դա պարզապես խոսքեր չեն, այլ դա հստակ ուղղություն է, հստակ քայլեր են, որոնք ՀՀԿ-ն իրականացնում է:
Ավելին, ըստ Շարմազանովի, ժողովրդավարական բարեփոխումներ իրականացնելու իշխող կուսակցության քաղաքական կամքի մասին խոսում են նաև արտախորհրդարանական ընդդիմությունն ու միջազգային կազմակերպությունները. «Չեմ կարծում, որ այստեղ որևէ խնդիր կա, մենք ինքներս ենք ամեն ինչ արել, որպեսզի բուհերը ապաքաղաքական լինեն, կուսակցությունները գործեն բացառապես կուսակցությունների մասին օրենքով»:
Մեր հարցին, թե կարելի է եզրակացնել, որ Րաֆֆի Հովհաննիսյանի նամակում նշված բոլոր կետերը ՀՀԿ-ն իրականացնում է և այդ նամակն ավելորդ էր, Շարմազանովը պատասխանեց. «Մի բան կարող եմ ասել` ՀՀԿ-ն իրականացնում է իր քաղաքականությունը, իսկ թե որքանով է այդ քաղաքականությունն արդյունավետ, կամ որքանով է մեր հասարակությունն ընդունում այդ քաղաքականությունը, կտեսնենք մայիսյան ընտրությունների ժամանակ»:
