«Հայաստան» համահայկական հիմնադրամը փոքր չափի նվիրատուներին ակտիվացնելու և նրանց գործը հեշտացնելու համար կիրառում է sms հաղորդագություններ և «Հայփոստի» բաժանմունքներում հանգանակություն անելու հնարավորություն է ստեղծել: Ինչպես «Առաջին լրատվական»-ին հայտնեցին Հիմնադրամից, այս 2 գործիքները կիրառվում են մարաթոնից 2-3 ամիս առաջ:
«Այս տարի նորույթն այն է, որ sms հաղորդագություններում ընդգրկել ենք նաև Ռուսաստանի համայնքը: Այժմ ՌԴ-ում բնակվողները նույնպես կարող են կարճ հաղորդագրություններ ուղարկել 7733 կարճ համարին: Տարբերությունն այն է, որ եթե տեղական հաղորդագրությունների արժեքը 500 դրամ է, ապա Ռուսաստանից ուղարկելու դեպքում՝ 10 դոլար»,- ասաց Հիմնադրամի աշխատակիցը՝ հավելելով, որ առավել հետաքրքիր նորություններ են սպասվում հաջորդ տարի հիմնադրամի 20-ամյակի կապակցությամբ:
2010 թ.-ին «Հայփոստի» բաժանմունքներում մինչև 1000 դրամի չափով Հիմնադրամին կանխիկ նվիրատվություն է կատարել շուրջ 25 հազար քաղաքացի: Նախորդ տարվա համեմատ այդ թիվն աճել է շուրջ 5 հզ. նվիրատուով:
Բացի այդ, 13,595 SMS ստացվել է 2009-ի դրամահավաքին (200, 600 և 1,000 դրամ արժողությամբ), իսկ 2010-ի դրամահավաքին` 20,440 SMS (500 դրամ արժողությամբ):
