Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է ԱՄՆ Խաղաղության կորպուսի պատվիրակությանը` տնօրեն Դեյվիդ Լիլիի գլխավորությամբ:
Քննարկվել են հետագա համագործակցությանն առնչվող հարցեր, հյուրերը փոխվարչապետին տեղեկություններ են ներկայացրել Հայաստանում իրենց գործունեության, ինչպես նաև հետագա անելիքների մասին:
Խաղաղության կորպուսի կամավորները Հայաստանի համայնքներում գործունեություն են ծավալում երեք` անգլերենի դասավանդման, համայնքի և բիզնեսի զարգացման, առողջապահական և բնապահպանական կրթության ուղղություններով:
Տեղեկացվել է, որ առողջապահական և բնապահպանական ծրագրերն ավարտվելու են 2012թ., իսկ մյուս երկուսը շարունակվելու են` ընդլայնելով շրջանակը:
Փոխվարչապետը նշել է, որ համայնքների զարգացման խնդիրները կառավարության ուշադրության կենտրոնում են:
Պայմանավորվածություն է ձեռք բերվել համագործակցության, աշխատանքների համակարգման վերաբերյալ:
