Մոսկվայում, 86 տարեկանում մահացել է դերասան, կրկնօրինակման անգերազանցելի վարպետ Արտյոմ Կարապետյանը: Այս մասին հաղորդում է РИА Новости-ն` վկայակոչելով ՌԴ Կինեմատոգրաֆիայի միությունը:
«Նա անջնջելի հետք է թողել խորհրդային և ռուսական կինոյի պատմության մեջ: Հանդիսատեսը հիշում և սիրում է նրա կերտած կերպարները… Նրա ձայնը հնչում է վերահնչյունավորված ֆիլմերից և հեռուստասերիալներից ամեն երրորդում: Նա նկարահանվել է մի շարք հայտնի ֆիլմերում, մարմնավորել է սպաների, լրտեսների»,- ասվում է միության տարածած հաղորդագրության մեջ:
Կարապետյանը մահացել է նոյեմբերի 18-ին, սակայն այդ մասին հաղորդվում է միայն այսօր: Դերասանի հետ հրաժեշտի արարողությունը տեղի կունենա նոյեմբերի 22-ին Կինոյի տան Սպիտակ սրահում:
Արտյոմ Կարապետյանը ծնվել է 1926 թ. հունիսի 28-ին, Թբիլիսիում: 1949 թ. ավարտել է Թբիլիսիի Գրիբոյեդովի անվան դրամատիկական թատրոնին կից ստուդիան և ընդունվել Երևանի Ստանիսլավսկու անվան թատրոն: 1957-1961 թթ. Կարապետյանն աշխատել է ՀԽՍՀ Հեռուստապետկոմում, իսկ 1961 թ.-ից՝ Մ. Գորկու անվան կինոստուդիայում: