CNN Türk-ը, վկայակոչելով իսրայելական Haaretz թերթին, հայտնում է, որ իսրայելական Mossad հետախուզական ծառայությունը, առանց երկրի իշխանությունների իրազեկվածության, գաղտնի բանակցություններ է վարել Թուրքիայի հետ, որի հետ Իսրայելը գտնվում է լարված հարաբերությունների մեջ։
Այս մասին հայտարարել է Իսրայելի արտգործնախարար Ավիգդոր Լիբերմանը։ Վերջինիս տվյալներով՝ Mossad-ը, առանց որևէ մեկին տեղյակ պահելու, ինքնուրույն գաղտնի բանակցություններ է վարել թուրքական կողմի հետ։ Այդ բանակցություններում խոսք է գնացել նախորդ տարվա մայիսի 31-ին գրանցված «Ազատության նավատորմ»-ի միջադեպից հետո սրված թուրք-իսրայելական հարաբերությունների կարգավորման մասին։
Լիբերմանի խոսքերով՝ Mossad-ն այդ բանակցությունների մասին որևէ տեղեկատվություն չի հաղորդել Իսրայելի ԱԳՆ-ին։ Նա հավելել է, որ Mossad-ը նման կերպ է վարվել նաև մի շարք աֆրիկյան երկրների, Հորդանանի ու Եգիպտոսի պարագայում։
Լիբերմանը երեկ հանդիպում է ունեցել վարչապետ Բենիամին Նեթանյահուի հետ, և վճռվել է, որ ԱԳՆ-ի աշխատակիցներն այսուհետ որևէ տեղեկություն չեն հաղորդելու Mossad-ին։
