Ադրբեջանական Turan լրատվական գործակալության փոխանցմամբ՝ նոյեմբերի 19-ի գիշերը զինված հարձակման է ենթարկվել ադրբեջանցի հանրահայտ գրող և հրապարակախոս Ռաֆիկ Թագին։ Ավտոկայանատեղիում նրան մոտեցել են անհայտ անձինք և դանակի հարվածներ հասցնել թիկունքի ու պարանոցի հատվածում։
Դրանից հետո նրանք փախուստի են դիմել։ Այժմ Թագին գտնվում է վերակենդանացման բաժնում։ Հարձակման պատճառը հայտնի չէ, սակայն, ամենայն հավանականությամբ, դա արել են իսլամիստները։
2006 թվականին Թագին «Սանաթ» թերթում հրապարակել էր «Եվրոպան և մենք» խորագրով մի հոդված, ուր վիրավորական հայտարարություններ էր գործածել իսլամի հասցեին։ Դրանից հետո Իրանի կրոնական գործիչները պահանջել էին պատժել հրապարակախոսին, իսկ տեղի իսլամիստները զանգվածային բողոքի ակցիա էին կազմակերպել՝ սպառնալով սպանել նրան։
Այդ ամենի արդյունքում Ռաֆիկ Թագին ու թերթի խմբագիր Սամիր Սադագաթօղլին ձերբակալվել ու դատապարտվել էին 3 և 4 տարվա ազատազրկման։ Մեկ տարի անց նրանք համաներման շնորհիվ հայտնվել էին ազատության մեջ։ Դատական գործընթացի ժամանակ իսլամիստները նրան դարձյալ սպառնացել էին պատժել իսլամը վիրավորելու համար։