РИА Новости-ի փոխանցմամբ՝ Իրանը հայտարարել է ԱԷՄԳ-ի հետ համագործակցելու իր պատրաստակամության մասին, եթե, իհարկե, ԱԷՄԳ-ը հավասարակշռի Իրանի հանդեպ իր դիրքորոշումը։ Այս մասին հայտարարել է Իրանի արտգործնախարար Ալի Աքբար Սալեհին։
Վերջինս նշել է. «Այսօր մենք ավելի քան երբևէ պատրաստ ենք համագործակցել ԱԷՄԳ-ի հետ, եթե նա հավասարակշռի իր դիրքորոշումը և հարգի կանոններն ու երաշխիքների մասին համաձայնագրերը։ Եթե դա տեղի ունենա, ապա մենք նախկինի նման և անգամ ավելի շատ պատրաստ ենք համագործակցել ԱԷՄԳ-ի հետ»։
Հիշեցնենք, որ ուրբաթ օրը ԱԷՄԳ-ի ղեկավար խորհուրդն ընդունել էր Իրանի միջուկային ծրագրի հարցով միջազգային միջնորդ հանդիսացող «վեցնյակի» պատրաստած բանաձևը։ Դրանում Իրանին կոչ էր արվում ակտիվ համագործակցել ԱԷՄԳ-ի հետ և թույլ տալ վերջինիս մասնագետներին ներթափանցելու իրանական միջուկային օբյեկտներ։
Այս բանաձևի օգտին քվեարկել են ԱԷՄԳ-ի ղեկավար խորհրդի 35 անդամներից 32-ը։ Կուբան ու Էկվադորը դեմ են քվեարկել բանաձևին, իսկ Ինդոնեզիան հրաժարվել է մասնակցել քվեարկությանը։