ԱՄՆ-ը պատրաստ է աշխատել Ռուսաստանի հետ հակահրթիռային պաշտպանության (ՀՀՊ) ոլորտում, եթե Մոսկվան «ցանկանում է համագործակցել Վաշինգտոնի և ՆԱՏՕ-ի հետ» այդ ուղղությամբ, սակայն ՀՀՊ վերաբերյալ Ռուսաստանին ինֆորմացիա տրամադրելու հարցում Վաշինգտոնը պատկերացում չունի, թե ինչի մասին է խոսքը: Այս մասին հայտարարել է ԱՄՆ պետքարտուղար Հիլարի Քլինթոնը՝ ամերիկյան Fox հեռուստաընկերությանը տված հարցազրույցում:
Հարցազրույցի ժամանակ լրագրողը նշել է, որ «համաձայն որոշ տեղեկությունների` ամերիկյան վարչակազմը պատրաստ է Ռուսաստանին տրամադրել կոնֆիդենցիալ տեղեկություն ՀՀՊ վերաբերյալ, որին ի պատասխան Քլինթոնն ասել է, որ «լավ չի պատկերացնում` ինչի մասին է խոսքը»:
Պետքարտուղարը հիշեցրել է, որ ԱՄՆ-ը «հենց սկզբից հստակ հասկացրել է ՀՀՊ համակարգը զարգացնելու իր պատրաստակամության մասին»` հերթական անգամ նշելով, որ այն ուղղված կլինի «այնպիսի երկրների դեմ, ինչպիսին Իրանն է»:
«Մենք միշտ ասել ենք, որ եթե ռուսները ցանկանում են համագործակցել ԱՄՆ-ի և ՆԱՏՕ-ի հետ ՀՀՊ համակագի զարգացման շուրջ, որը կպաշտպանի ինչպես նրանց, այնպես էլ մեզ, ապա մենք պատրաստ ենք աշխատել նրանց հետ»,- ասել է Քլինթոնը:
