Իրանի նկատմամբ ՄԱԳԱՏԵ-ի կայացրած որոշումն էլ ավելի կմեծացնի միջուկային ծրագիրը զարգացնելու Իրանի ցանկությունները: Այս մասին հայտարարել է ՄԱԳԱՏԵ-ում Իրանի հատուկ ներկայացուցիչ Ալի Ասգար Սոլտանիեն: Այս մասին հաղորդում է Reuters-ը:
Ըստ նրա՝ Թեհրանը չի պատրաստվում դադարեցնել ուրանի հարստացումը և չի պատրաստվում զիջել աշխարհի խոշորագույն տերություններին: Սոլտանիեն ավելացրել է, որ Իրանը չի մասնակցելու Մերձավոր Արևելքի երկրների համար ՄԱԳԱՏԵ-ի կողմից կազմակերպված հադիպմանը, որի ընթացքում քննարկվելու են միջուկային էներգետիկայի հարցերը:
Նա նաև քննադատել է կազմակերպության գլխավոր տնօրեն Յուկիո Ամանոյին, հայտարարելով, որ նա պրոֆեսիոնալ չէ և նոյեմբերի 21-22-ը նախատեսվող հանդիպումն արդյունավետ չի լինելու:
Մի քանի ժամ առաջ ՄԱԳԱՏԵ-ն որոշում է ընդունել, որում ասվում է, որ անհրաժեշտ է, որպեսզի կազմակերպության փորձագետները իրանական միջուկային օբյեկտներ մուտքի իրավունք ունենան:
