Համացանցում տարածվել է «Գրավե՛ք Flash» (Occupy Flash) շարժումը, որը ստեղծվել է Adobe plug-in-ի դեմ պայքարելու համար: Շարժման կայքում հաղորդվում է, որ նրա նպատակն է հասնել օգտատերերի դիտարկիչներից Flash-նվագարկչի հեռացմանը:
Computerworld կայքին տված հարցազրույցում շարժման մասնակիցներից մեկն ասել է, որ համացանցը բաց տարածություն է, և իրենք կողմ են համացանցում բաց տեխնոլոգիաների կիրառմանը: Ընդ որում՝ նա չի հայտնել իր անունը, սակայն նշել է, որ ընկերությունները և աշխատակիցները, որոնք մասնակցում են շարժմանը, երբեք Adobe-ին մրցակից չեն համարել:
Կայքում բացատրվում է, թե ինչպես պետք է դիտարկիչից ջնջել plug-in-ը: Շարժման հիմնադիրները նշում են, որ արշավն ուղղված չէ Adobe-ի և հենց Flash-ի դեմ:
Adobe ընկերությունը նոյեմբերի 9-ին հայտարարել է բջջային սարքավորումների համար Flash plug-in-ի մշակման գործընթացի դադարեցման մասին: Շատերը հիշել են, որ Սթիվ Ջոբսը քննադատել է այդ տեխնոլոգիան և «թույլ չի տվել» Apple ընկերության բջջային սարքավորումների վրա տեղադրել Flash-ը:
Նշենք, որ «Գրավե՛ք Flash» անունը համահունչ է «Գրավե՛ք Ուոլ Սթրիթը» շարժման անվան հետ:
