Կիրակի օրը Իջևանում քաղաքապետի թեժ ընտրությունն ավարտվեց ՀՀԿ-ական թեկնածու, 12 տարի գործող քաղաքապետ, 49-ամյա Վարուժան Ներսիսյանի պարտությամբ: ԲՀԿ անդամ Վարդան Ղալումյանը հավաքեց 5044 քվե, Վարուժան Ներսիսյանը` 3406: Վարուժան Ներսիսյանը ընտրությունների ընթացքի, ինչպես նաև առաջիկա անելիքների մասին պատասխանել է մեր հարցերին:
– Պարոն Ներսիսյան, ըստ Ձեզ` որքանո՞վ թափանցիկ անցան Իջևանի քաղաքապետի ընտրությունները, երբ մեզ մինչև ընտրությունը տված հարցազրույցում նշում էիք, որ ընտրակաշառք էր բաժանում ԲՀԿ-ն:
– Նախ` ուզում եմ շնորհակալություն հայտնել բոլոր ինձ ընտրողներին, որոնք բոլոր ընտրություններին իրենց ձայնը ինձ են տվել և իմ կատարած աշխատանքներին: Այնպես որ, այսօր ես ինձ հաղթողի կարգավիճակում եմ զգում, այսքան մարդ միշտ իմ կողքին կանգնած է եղել յուրաքանչյուր ընտրության ժամանակ: Ես ընդհանուր առմամբ նույն ձայներն եմ ստացել` առանց վարչական և տեղի կուսակցական կառույցի աջակցության: Մի կողմում ես իմ համախոհների հետ էի, իսկ մյուս կողմում ԲՀԿ-ն իր բոլոր ռեսուրսներով` վարչական, կուսակցական, պատգամավորական: Ես միշտ պայքարել եմ որպես անհատ: Իջևանը ոչ թե կարիք ուներ մայրաքաղաք Երևանից այդպիսի դեսանտի` ընտրակաշառքի, բամբասանքների, բողոքող խմբերի, սև PR-ի, այլ ինչպես հանրապետության մյուս համայնքները, կարիք ուներ համերաշխ մթնոլորտի և լուրջ աջակցության: Հուսով եմ, որ այն խոստումները, որ ԲՀԿ-ն և նրա թեկնածուն տվել են` կապված աշխատավարձերի բարձրացման, նպաստների ավելացման, աշխատատեղերի ստեղծման, քաղաքի բոլոր փողոցների ասֆալտապատման ուղղությամբ, այնպիսի խոստումներ, որ քաղաքապետի իրավասություններից մեծ մասամբ դուրս են, մինչև գարնանը խորհրդարանական ընտրություններ` դրանց մի մասն իրականացրած կլինի:
– Փաստորեն, ՀՀԿ-ն Ձեզ աչքաթող արեց, չսատարեց: ՀՀԿ խմբակցության քարտուղար Էդուարդ Շարմազանովն էլ օրերս հայտարարեց, որ ի՞նչ տարբերություն` ով է ընտրվել, մեր կոալիցիոն գործընկերն է հաղթել ընտրություններին:
– Նախ կուզենայի ասել` խոսքը ոչ թե Հանրապետական կուսակցության, այլ երևի Իջևանի մարզային կառույցի մասին է, եթե դրա մասին է, ապա` իհարկե… Բայց ես գտնում եմ, որ մնալու եմ Իջևանում և ակտիվորեն զբաղվելու եմ քաղաքականությամբ: Կուսակցական առումով իմ ընտրությունը կատարել եմ, կծավալեմ կուսակցական ակտիվ աշխատանք, հատկապես հիմա ավելի կարևոր է, քանի որ մեզ առջևում լուրջ համապետական ընտրություններ են սպասվում՝ սկզբում ԱԺ-ի, հետո՝ ՀՀ նախագահի: Փորձելու ենք շտկել ՀՀԿ տեղական կառույցում տիրող վիճակը, որ այլևս ՀՀԿ տեղական կառույցի անդամները չաշխատեն այլ կուսակցությունների օգտին:
– Տավուշի մարզպետ Արմեն Ղուլարյանն այդպես էլ Ձեզ չաջակցեց: Ձեր հարաբերությունները լարվա՞ծ են:
– Եթե անձնական հարաբերությունների մասին է խոսքը, ապա նորմալ հարաբերություններ են:
– Իսկ կուսակցակա՞ն:
– Մարզպետը մեր մարզի Հանրապետական կառույցի ղեկավարն է, ես էլ կուսակցության սովորական անդամ եմ:
– Ասում են` Սերժ Սարգսյանը դրական վերաբերմունք ունի Ձեր նկատմամբ և Ձեզ առանց պաշտոն չի թողնի: Ձեզ այս լուրերը հասե՞լ են, և ի՞նչ պաշտոնի ակնկալիք ունեք:
– Ասացի` ինչով եմ զբաղվելու, ես պատրաստվելու եմ ընտրությունների և կուսակցությունում փորձելու եմ իրավիճակը շտկել: Մի քիչ էլ իմ ընտանիքով կզբաղվեմ, որովհետև այս տարիներին, բնական է, որ այդ հնարավորությունը չի եղել և, իհարկե, ակտիվ քաղաքականությամբ կզբաղվեմ: Ինչ վերաբերում է պաշտոնին, ապա, ճիշտն ասած, դա նախագահի տրամադրության տակ է՝ որպես կուսակցության ղեկավարի:
– Հնարավո՞ր է՝ այս անգամ որպես պատգամավոր առաջադրվեք:
– Այս պահին դա բացառվում է, ես չեմ էլ մտածում դրա մասին:
– Ինչո՞վ եք պայմանավորում, որ «Ժառանգությունը», ՀՅԴ-ն և Հայ ազգային կոնգրեսն այս անգամ աջակցեցին ԲՀԿ թեկնածուին:
– Ճիշտն ասած՝ սա նորություն չէ, և միշտ էլ Դաշնակցությունն ու «Ժառանգությունը» աջակցել են մյուս թեկնածուին, և լավ կլինի այդ հարցն ուղղել նրանց, ես նրանց փոխարեն չեմ կարող պատասխանել: Բայց որ լիարժեք, անմնացորդ սատարում էին մյուս թեկնածուին, դա փաստ է:
– Մեր նախորդ զրույցում Դուք նշեցիք, որ ընտրության արդյունքները բողոքարկելը Ձեր ոճի մեջ չի մտնում, իսկ պարտությո՞ւնը:
– Այո, ես ասացի` բողոքարկելն իմ ոճի մեջ չէ, և մինչև հիմա էլ այդպես է, և ես չեմ բողոքարկում, չնայած այսքան խախտումներին, ընտրակաշառքներ բաժանելու փաստերին… Ցուցակների մեջ Աբովյանից ավտոբուսներով մարդիկ են բերել և քվեարկել են ընտրատեղամասերում, բայց ես էլի եմ կրկնում` իմ ոճի մեջ չէ… Իսկ ինչ վերաբերում է, որ ես պարտվել եմ, ես ինձ հաղթած եմ համարում, որ այդքան մարդ ինձ ձայն է տվել, որ այդքան վստահության քվե եմ ստացել, և այդքան մարդ իմ կողքին է: Դա արդեն հաղթանակ է:
– Իսկ եթե ՀՀԿ-ն, այնուամենայնիվ, Ձեզ աջակցեր և ընտրակաշառքի համար մեծ գումարներ տար, արդյունքները ա՞յլ կլինեին:
– Սա իմ` որպես քաղաքի ղեկավարի հինգերորդ ընտրությունն էր, և ոչ մի ընտրության ես ընտրակաշառք չեմ բաժանել: Այս ընտրությունների ժամանակ հանրապետության նախագահն էր խնդիր դրել, որ որևէ մեկին ընտրակաշառք չբաժանվի:
– Եթե արդար և թափանցիկ ընտրություններ լինեին, ի՞նչ եք կարծում՝ Դուք կհաղթանակեի՞ք:
– Սա արդացում չէ, արդար ընտրությունների խնդիրը չէ: Մի կողմում ԲՀԿ-ի ամբողջ ռեսուրսն էր, և ամբողջ քարոզչությունն իրականացնում էին ԱԺ ընտրությունների նման: Իսկ մյուս կողմում՝ տեղական մակարդակի ընտրություններ էին, դրա համար էլ այդպիսի արդյունք ստացվեց:
– Եթե հանրապետության նախագահը խնդիր էր դրել ընտրակաշառք չբաժանել, այդ նույն հանրապետության նախագահը ԲՀԿ-ի նախագան էլ չէ՞, այդ դեպքում նրանք ինչպե՞ս թույլ տվեցին իրենց:
– Խնդրում եմ` ինձ այնպիսի հարցեր չտալ, որ ես չկարողանամ իրենց փոխարեն պատասխանել: