Հարավային Կովկասի բոլոր երեք պետություններն էլ, մի քիչ ուշ, մի քիչ շուտ, կանգնելու են ընտրությունների շեմին, և ԵՄ-ն փորձում է այդ երկրներում ընտրություններից առաջ որոշակի հարցեր ճշտել: ԵՄ արտաքին գործերի և անվտանգության քաղաքականության հարցերով բարձր ներկայացուցիչ Քեթրին Էշթոնի այցը Հայաստան տեղավորվում է հենց այս փիլիսոփայության տրամաբանության մեջ: «Առաջին լրատվական»-ի հետ զրույցում նման տեսակետ հայտնեց Հայաստանի լիբերալ կուսակցության նախագահ, ՀԱԿ ներկայացուցիչ Հովհաննես Հովհաննիսյանը:
«Եթե Քեթրին Էշթոնի կարգի գործիչը Հայաստան այցելեր ոչ թե տարածաշրջանային այցով, այլ հատուկ գար մեր երկիր, ապա այդ այցը բոլորովին այլ նշանակություն կունենար»,- միաժամանակ նկատեց քաղաքական գործիչը՝ ընդգծելով, որ այդ դեպքում այցի կարևորությունը ավելի մեծ կլիներ:
Անդրադառնալով Քեթրին Էշթոնի՝ ԵԱՀԿ Մինսկի խմբի համանախագահների կողմից ԼՂ հակամարտության լուծմանն ուղղված ջանքերին աջակցելու մտքին՝ Հովհաննես Հովհաննիսյանը նշեց, որ ԵՄ-ն և նույն ինքը՝ Էշթոնը, գոնե մեկ տարի առաջ էին հայտարարում, որ իրենք շատ ավելի ինտենսիվ ու լուրջ պետք է զբաղվեն ԼՂ հակամարտության հարցով:
«Այնպես որ, ԵՄ-ն գոնե վերջին մեկ տարվա ընթացքում ինտենսիվ կերպով զբաղվում է ղարաբաղյան հարցի կարգավորմամբ: Քանի դեռ հակամարտությունը չի լուծվել, ԵԱՀԿ Մինսկի խմբի աշխատանքները չեն բավարարում ԵՄ-ին ու միջազգային հանրությանը: ԵՄ-ն գնում է այն ճանապարհով, որում թեև Մինսկի խմբի ստատուս քվոն պահպանվում է, բայց ԵՄ-ն շատ ավելի ակտիվ մասնակցություն է ցուցաբերում կարգավորման գործընթացին և աջակցում է ԵԱՀԿ Մինսկի խմբին»:
Հիշեցնենք, որ տարածաշրջանային այցի շրջանակներում Քեթրին Էշթոնը Հայաստան է ժամանել այսօր՝ նոյեմբերի 17-ին: ՀՀ ԱԳ նախարար Էդվարդ Նալբանդյանի հետ հանդիպման ժամանակ նա նշել է, որ Եվրամիությունը կարևորում է Հայաստանի հետ համակողմանի համագործակցության զարգացումը և շարունակելու է իր աջակցությունը մեր երկրի զարգացմանն ու բարեփոխումների իրագործմանը: Զրուցակիցները արձանագրել են, որ վերջին շրջանում հարաբերությունները դինամիկ զարգացում են ապրել, որն արտահայտվում է թե՛ բարձր մակարդակի շփումներով, թե՛ քաղաքական երկխոսության օրակարգի ընդլայնմամբ և խորացմամբ, թե՛ ասոցացման համաձայնագրի բանակցություններում շարունակական առաջընթացով:
Քեթրին Էշթոնն իր աջակցությունն է հայտնել ԼՂ հակամարտության լուծման ուղղությամբ ԵԱՀԿ Մինսկի խմբի համանախագահների կողմից ձեռնարկվող ջանքերին:
