ԵՄ արտաքին գործերի և անվտանգության քաղաքականության հարցերով բարձր ներկայացուցիչ Քեթրին Էշթոնի այցը Հայաստան վկայում է, որ մեր երկիրը տարածաշրջանում ուրույն տեղ ու բոլոր վեկտորներով իր հավասարակշռող դերն ունի: «Առաջին լրատվական»-ի հետ զրույցում նման տեսակետ հայտնեց ՀՀԿ-ական պատգամավոր Արտակ Զաքարյանը:
««Արևելյան գործընկերությունը» ԵՄ համար և՛ քաղաքական, և՛ տնտեսական բավական մեծ նշանակություն ունի, և Էշթոնի այցն այս առումով հետաքրքրություն ցուցաբերող պետք է դիտարկել: Վերջին տարիներին Հայաստանը բավականին ակտիվ դերակատարություն ունի «Արևելյան գործընկերության» ծրագրերում, ձգտում է մասնակից լինել եվրոպական ընդհանուր գործընթացներին: Հայաստան-ԵՄ ուղիղ և բազմակողմ հարաբերությունները ինքնին խոսում են այն մասին, որ այդ հարաբերությունների օրակարգում գտնվող խնդիրները բազմաթիվ են՝ սկսած տնտեսական, վերջացրած ժողովրդավարության հարցերով»,- ասաց նա:
Անդրադառնալով Քեթրին Էշթոնի՝ ԵԱՀԿ Մինսկի խմբի համանախագահների կողմից ԼՂ հակամարտության լուծմանն ուղղված ջանքերին աջակցելու մտքին՝ Արտակ Զաքարյանը նկատեց. «Բնականաբար, ԵԱՀԿ Մինսկի խումբը հարցի կարգավորման միակ արդյունավետ ձևաչափն է, և դա բոլորն են գիտակցում: ԵՄ-ն, շահագրգռված լինելով «Արևելյան գործընկերության» անդամ երկրներում առկա հակամարտությունների կարգավորմամբ, բնականաբար առաջնորդվում է խաղաղության ու կայունության սկզբունքներով: Միանշանակ է, որ այս հարցում ԵՄ ներկայացուցիչն իր աջակցությունն է հայտնում հակամարտության կարգավորման հարցն առաջ տանելուն»,- ամփոփեց ՀՀԿ-ական պատգամավորը:
Հիշեցնենք, որ տարածաշրջանային այցի շրջանակներում Քեթրին Էշթոնը Հայաստան է ժամանել այսօր՝ նոյեմբերի 17-ին:
ՀՀ ԱԳ նախարար Էդվարդ Նալբանդյանի հետ հանդիպման ժամանակ նա նշել է, որ Եվրամիությունը կարևորում է Հայաստանի հետ համակողմանի համագործակցության զարգացումը և շարունակելու է իր աջակցությունը մեր երկրի զարգացմանն ու բարեփոխումների իրագործմանը: Զրուցակիցները արձանագրել են, որ վերջին շրջանում հարաբերությունները դինամիկ զարգացում են ապրել, որն արտահայտվում է թե՛ բարձր մակարդակի շփումներով, թե՛ քաղաքական երկխոսության օրակարգի ընդլայնմամբ և խորացմամբ, թե՛ ասոցացման համաձայնագրի բանակցություններում շարունակական առաջընթացով:
Քեթրին Էշթոնն իր աջակցությունն է հայտնել ԼՂ հակամարտության լուծման ուղղությամբ ԵԱՀԿ Մինսկի խմբի համանախագահների կողմից ձեռնարկվող ջանքերին:
