«ՀԺ»-ն գրում է, որ շատ մեծ է հավանականությունը, որ շուտով Երևանի հենց սրտում՝ «Մոսկվա» կինոթատրոնի և «Գոլդենթուլիփ» հյուրանոցի հարևանությամբ, սկսվի մի հսկայական շինարարություն, որի արդյունքում այդտեղ վեր խոյանա Երևանի ամենաբարձր՝ 50 հարկանի շենք:
«Մեր տեղեկություններով, Երևանի քաղաքապետարանի համապատասխան ստորաբաժանումներում և նախագծային մի քանի ինստիտուտներում, հույժ գաղտնի պայմաններում, քննարկվում է այս ծրագիրը: Երևանի կենտրոնում այսպիսի շենք է ուզում կառուցել իրանական մի կիսապետական ընկերություն: Շենքը կոչվելու է «Պերսիա թաուեր» (պարսկական աշտարակ): Մի քանի հարկը լինելու է առևտրային նշանակության, մի քանիսը՝ բնակելի, ավելի քան 10 հարկ՝ հյուրանոց և այլն: Ըստ քաղաքապետարանի մեր աղբյուրների` այս նախագծի իրականացման համար իրանական կողմը արդեն կոնկրետ քայլեր է անում համապատասխան պաշտոնյաների շահագրգռելու համար: Այսինքն, ովքեր իրավասու են այս նախագիծը կյանքի կոչելու հետ կապված որոշում կայացնել, կարող են ակնկալել որոշակի «լավ վերաբերմունք»:
Երևանի գլխավոր ճարտարապետ Նարեկ Սարգսյանն իր օգնականի միջոցով մեզ փոխանցեց, որ ինքը ծանոթ է այս նախագծին, բայց որևէ վերաբերմունք առայժմ չի հայտնի: Ըստ մեզ փոխանցած պատասխանի` հարցը դեռ չի քննարկվել քաղաքաշինական խորհրդում, ինչը նշանակում է, որ պաշտոնապես նման նախագիծ դեռ չկա: Նման պատասխանը արդեն իսկ վտանգի զգացում է առաջացնում: Որ նշված տեղում նման կառույցը ուղղակի խայտառակություն է, ակնհայտ է անգամ ոչ մասնագետի համար: Եվ եթե գլխավոր ճարտարապետը խուսափում է միանգամից որպես մասնագետ անկեղծ գնահատական տալ նախագծին, նշանակում է` արդեն իսկ չի բացառում Երևանի սրտում նման կառույց թույլ տալու հնարավորությունը: Հասկանալի է, նման որոշում կայացնելիս համապատասխան պաշտոնյաները ամենևին Էլ չեն առաջնորդվելու մասնագիտական չափորոշիչներով: Նրանց համար կարևոր է լինելու վերևի հրահանգը, և թե որքան կկազմի «լավ վերաբերմունքը»:
Իսկ դրական որոշումից հետո կխոսեն խոշորածավալ ներդրման մասին, դրանից հետո միայն այս շենքի կառուցմամբ կպլպլացնեն շինարարությանը վերաբերող վիճակագրական ցուցանիշները, վերջում Էլ կհայտարարեն’ տեսնո՞ւմ եք, ոնց ենք շենացնում Հայաստանը:
Մի խոսքով՝ «հաց և տեսարաններ»: Իսկ իրանական կողմի շահագրգռվածությունն այլ է. Երևանի ամենաբարձր շենքը նույնիսկ ամենաբացասական իմաստով կդառնա սիմվոլ, և դրա անունը կլինի «Պերսիա թաուեր» ՝ դրանից բխող հետևանքներով: Այսինքն, ասելով Երևան՝ դրա սիմվոլներից մեկն էլ կդիտարկվի «Պերսիա թաուերը», որը կխորհրդանշի Իրանի հզորությունը, ներկայությունը ամբողջ աշխարհում և այլն: Եվ այդ նպատակով դժվար թե իրանցիները նախագծի իրականացման համար միջոցների առաջ կանգնեն: Այնպես որ, այս նախագծի իրականացման հավանականությունը կարելի է բավական բարձր գնահատել»:
