Պաղեստինի ինքնավարության ղեկավար Մահմուդ Աբասը և ՀԱՄԱՍ իսլամական շարժման քաղբյուրոյի ղեկավար Խալեդ Մաշալը հանդիպելու են նոյեմբերի 23-ին Եգիպտոսի մայրաքաղաք Կահիրեում, որպեսզի քննարկեն միջպաղեստինյան կարգավորման գործընթացը:
Ինչպես հայտնում է РИА Новости-ն, Պաղեստինի ղեկավարը այս մասին հայտնել է նոյեմբերի 16-ին ելույթ ունենալով հանրահավաքին` նվիրված Պաղեստինի ինքնավարության առաջին նախագահ Յասիր Արաֆաթի մահվան օրվան: Աբասը նշել է, որ մտադիր է Մաշալի հետ քննարկել «ապագայի հարցեր», որոնք վերաբերում են մասնավորապես ինքնավարությունում անցկացվող ընտրություններին և Պաղեստինի ազգային խորհրդին, ինչպես նաև անկախ թեկնածուներից կազմված Պաղեստինի միասնական անցումային կառավարության ձևավորման հարցերը:
Ավելի վաղ եգիպտական МЕНА գործակալությունը, հղում կատարելով Աբասի խորհրդական Նիրմա Համադին, հայտնել էր, որ այդ հանդիպումը տեղի է ունենալու նոյեմբերի 24-ին: Համադի խոսքերով, քաղաքական գործիչները քննարկելու են նաև տարածաշրջանում տիրող իրավիճակը և մշակելու են միասնական պաղեստինյան դիրքորոշում միջազգային խնդիրների վերաբերյալ:
Չորս տարի պատերազմելուց հետո պաղեստինյան ՖԱԹՀ և ՀԱՄԱՍ շարժումները Կահիրեում մայիսի սկզբին համաձայնել են միջպաղեստինյան հաշտություն կնքել: Կողմերը համաձայնել էին Պաղեստինում անցկացել համընդհանուր նախագահական և խորհրդարանական ընտրություններ, ինչպես նաև ստեղծել նոր անցումային կառավարություն` կազմված անկախ թեկնածուներից: Սակայն հետագա բանակցությունները փակուղի մտան: ՀԱՄԱՍ-ը ընդդիմացավ Պաղեստինի ներկայիս վարչապետ Սալյամ Ֆայյադի թեկնածությանը:
Հիշեցնենք, որ 2007 թվականին ՀԱՄԱՍ խմբավորման իսլամիստները հեղաշրջում կատարեցին Գազայի հատվածում` այնտեղից դուրս մղելով ՖԱԹՀ-ի և Պաղեստինի ինքնավարության կառույցները Հորդանան գետի Արևմտյան ափ: Օրերս Պաղեստինի ինքնավարությունը առաջարկել է պաղեստինյան կուսակցություններին ընտրել նոր թեկնածու նոր ձևավորվող անցումային կառավարության համար:
