Իրանական Irib News լրատվական գործակալության փոխանցմամբ՝ ՄԱԿ-ում Իրանի ներկայացուցիչը զգուշացրել է ԱՄՆ-ին ու Սաուդյան Արաբիային՝ Վաշինգտոնում սաուդյան դեսպանի ենթադրյալ մահափորձը դատապարտող բանաձևի ներկայացման հետևանքների մասին։
Իրանական այս զգուշացումը պայմանավորված է նրանով, որ երեկ ԱՄՆ-ն ու Սաուդյան Արաբիան որոշել են ՄԱԿ-ի քարտուղարություն ներկայացնել Վաշինգտոնում Սաուդյան Արաբիայի դեսպան Ադիլ Ալ Ջուբեյրի դեմ մահափորձը դատապարտող բանաձևի նախագիծ։
ՄԱԿ-ում Իրանի մշտական ներկայացուցիչ Մուհամեդ Խազաին իր նամակում Գլխավոր ասամբլեայի ղեկավարին ու ՄԱԿ-ի գլխավոր քարտուղարին զգուշացրել է դրա վնասակար հետևանքների մասին։ Իր նամակում Խազաին տվյալ որոշումը գնահատել է որպես աննախադեպ, վտանգավոր ու անընդունելի, ինչը կասկածի տակ է դնում ՄԱԿ-ի հեղինակությունը։ Խազաին ընդգծել է.
«Այդ բանաձևի նախագիծը բացառապես հենված է անհիմն պնդումների վրա։ ՄԱԿ-ի այլ անդամի դեմ նմանատիպ բանաձևի ներկայացումը վկայում է այն մասին, որ Վաշինգտոնը միայն նպատակ է հետապնդում ՄԱԿ-ի Գլխավոր ասամբլեայի միջոցով իր անհեռանկար քաղաքականությունն առաջ տանելու։ Եթե ՄԱԿ-ն ուշադրություն դարձնի Վաշինգտոնի ներկայացրած ցանկացած չնչին հարցերի բանաձևին, ապա կվերածվի նրա գործիքի»։
Հիշեցնենք, որ ավելի վաղ Թուրքիայի արտգործնախարար Ահմեդ Դավութօղլուն իրանական կողմին խորհուրդ էր տվել լրջորեն վերաբերվել ԱՄՆ-ի նմանատիպ մեղադրանքներին։