Թուրքական Hürriyet թերթի փոխանցմամբ՝ Թուրքիայի էներգետիկ ու բնական պաշարների նախարար Թաներ Յըլդըզը պատասխանել է ատոմակայանների կառուցման հարցում իրանական կողմի առաջարկին։
Հիշեցնենք, որ Իրանի Մարդու իրավունքների բարձրագույն խորհրդի և ֆիզիկայի ու մաթեմատիկայի իրանական ինստիտուտի ղեկավար Մոհամադ Ջավադ Լարիջանին Նյու Յորքում լրագրողներին հայտարարել էր, որ իր երկիրը ցանկանում է օգնել Թուրքիային ատոմակայաններ կառուցելու հարցում և պատրաստ է Թուրքիայի հետ կիսել միջուկային տեխնոլոգիաների ոլորտում ունեցած իր փորձը։
Այս կապակցությամբ Յըլդըզը նշել է. «Մեզ համար Իրանը շատ կարևոր հարևան երկիր է, Թուրքիան և Իրանը նավթի ու գազի առևտուր են անում, էլեկտրաէներգիայի արտադրությանն առնչվող համապատասխան նախագծեր են իրականացնում։ Սակայն ներկայումս ատոմակայանների կառուցման հարցում համագործակցության մասին խոսք գնալ չի կարող»։
Հիշեցնենք, որ թուրքական առաջին ատոմակայանը կառուցելու է Ռուսաստանը։ Այն կառուցվելու է միջերկրածովյան Մերսին նահանգի Աքքույու վայրում։ Երկրորդ ատոմակայանը կառուցվելու է սևծովյան Սինոպում. այդ կապակցությամբ բանակցություններ էին տարվում Ճապոնիայի հետ, սակայն Ֆուկուսիմայի աղետից հետո Ճապոնիան հրաժարվեց։
Ներկայումս բաց է մնում նաև Թուրքիայի պլանավորած երրորդ ատոմակայանի՝ Իղնեադայի (Թրակիա, եվրոպական հատված) կառուցողի հարցը։
