ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ նոյեմբերի 14-ին համատեղության կարգով Անդորրայի Իշխանությունում ՀՀ դեսպան Վիգեն Չիտեչյանն իր հավատարմագրերն է հանձնել Անդորրայի Իշխանության համիշխան, Իսպանիայի Ուխելի եպիսկոպոս Խուան Էնրիկ Վիվես Սիսիլիային:
Հավատարմագրերի հանձնման պաշտոնական արարողությանը հաջորդած առանձնազրույցի ընթացքում Անդորրայի համիշխանը համոզմունք է հայտնել, որ Անդորրայի և Հայաստանի բարեկամական հարաբերություններն առաջիկա տարիներին կզարգանան ու ավելի կխորանան:
ՀՀ դեսպանը կարևորել է Անդորրայի Իշխանության հետ Հայաստանի երկկողմ հարաբերությունների զարգացումը, ինչպես նաև համագործակցությունը ՄԱԿ-ի, ՅՈՒՆԵՍԿՕ-ի, Եվրախորհրդի, Ֆրանկոֆոնիայի միջազգային կազմակերպության հետ:
Նույն օրը Չիտեչյանը հանդիպել է Անդորրայի արտգործնախարար Ժիլբեր Սաբոյա Սունիեի հետ, քննարկել ինչպես հայ-անդորրական հարաբերություններին առնչվող, այնպես էլ ընդհանուր հետաքրքրություն ներկայացնող միջազգային և տարածաշրջանային հարցեր:
