Սիրիայի ընդդիմությունը ոչ մի նախնական բանակցություններ չի սկսի նախագահ Բաշար Ալ-Ասադի իշխող վարչակարգի հետ: Այս մասին հայտարարել է Սիրիայի Ազգային խորհրդի ղեկավար Բուրհան Գալյունը Մոսկվայում տեղի ունեցած մամլո ասուլիսի ժամանակ:
«Բանակցություններ կարող են տեղի ունենալ միայն Սիրիայում նոր, ժողովրդավարական և քաղաքացիական հասարակություն ստեղծելու դեպքում»,- նշել է ընդդիմության առաջնորդը:
Ինչպես հաղորդում է РИА Новости-ն, նրա խոսքերով` իշխանության բոլոր ներկայացուցիչները պետք է հրաժարվեն նախկին վարչակարգի հետ կապերից և խոստովանեն, որ Սիրիայում զարգացման հերթական փուլն ավարտված է: Գալյունը նաև հայտարարել է, որ Դամասկոսի հետ բանակցություններ սկսելու համար անհրաժեշտ է «միջազգային երաշխիքներ տալ, միջազգային մոնիտորինգ անցկացնել երկրում իրավիճակը պարզելու համար, ինչպես նաև այդ բանակցությունների սկիզբը և ավարտը նշող հստակ ժամկետ սահմանել»:
Սիրիայի Ազգային խորհուրդը երկրի ամենախոշոր ընդդիմադիր ուժն է: Այն ստեղծվել է Ստամբուլում ընթացիկ տարվա օգոստոսին: Նրա կազմի մեջ են մտնում 230 ընդդիմադիր քաղաքական գործիչներ, որոնք ապրում են ինչպես Սիրիայում, այնպես էլ նրա սահմաններից դուրս:
