Ազգային ժողովում այսօր սկսվել են 2012 թվականի բյուջեի քննարկումները: Այսօր կայացած մամուլի ասուլիսում այս մասին հայտարարեց ՀՀԿ պատգամավոր Գագիկ Մելիքյանը:
«Երկիրը կարծես թե կամաց-կամաց վերադառնում է կայուն փուլ, անցում ենք կատարում ավելի ճկուն տնտեսության: Մենք արդեն հաղթահարում ենք հետճգնաժամային ամենաբարձր ցուցանիշը:
Կարևոր եմ համարում բյուջեի հատկապես սոցիալական հատվածը, որով նախատեսվում է, որ նպաստները և թոշակները կավելանան 10 տոկոսով, մոտ 20 տոկոսով կավելանան ռազմական ոլորտին տրամադրվող գումարները` կազմելով 206 մլրդ դրամ:
Հատկացումներ կլինեն կապի, տրանսպորտի և գյուղատնտեսության ոլորտներում: Բավական լուրջ քաղաքականություն է ակնկալվում իրականացնել հարկային վարչարարության իրականացման հաշվին»,- ասաց Մելիքյանը:
Անդրադառնալով Հովիկ Աբրահամյանի հրաժարականին` նա նկատեց, որ ՀՀԿ-ն նպատակ ունի և իր վրա է վերցնում Հայաստանում արդար և թափանցիկ ընտրություններ անցկացնելու պատասխանատվությունը:
«ԱԺ նախագահի պաշտոնի վերաբերյալ քննարկումներ դեռևս չեն եղել, և կոռեկտ չի լինի այս պահի դրությամբ թեկնածուների անուններ հայտարարել»,- նկատեց նա:
Խորհրդարանականը քաղաքական ներկա իրավիճակը «նորմալ» գնահատեց` նկատելով, որ քաղաքական ուժերը փորձում են համախմբել իրենց ուժերը` ընտրություններին ավելի լավ ներկայանալու համար:
Պատգամավորը նաև նշեց, որ անընդունելի է, երբ Սյունիքի մարզպետը գործարար կնոջ է ծեծում: «Սակայն համոզված չեմ, որ նման բան է տեղի ունեցել. այդ մասին տեղեկացել եմ մամուլից և ականատեսներից մեկի հետ էլ զրուցել եմ, ով հավաստել է, որ նման բան չի եղել»,- ասաց Գագիկ Մելիքյանը:
Անդրադառնալով արտաքին քաղաքականության, ԼՂ հակամարտության թեմային` ՀՀԿ-ական պատգամավորը նկատեց, որ կարգավորման գործընթացը կարող է փոքր-ինչ հապաղել:
«Քաղաքական, ընտրական գործընթացները կստիպեն, որ կարգավորման գործընթացը մի քիչ դանդաղի: Ինչ վերաբերում է Ադրբեջանի` ՄԱԿ-ի Անվտանգության խորհրդի ժամանակավոր անդամ ընտրվելուն, ապա չեմ կարծում, որ նրան հաջողվի ԼՂ հարցը տեղափոխել ՄԱԿ բարձր ատյաններ, որքան էլ նա դա փորձի: ՄԱԿ-ի 5 մշտական անդամներից 3-ը ԵԱՀԿ Մինսկի խմբի համանախագահներ են և գիտակցում են, որ հարցը կարող է լուծվել միայն ԵԱՀԿ Մինսկի խմբի շրջանակներում»:
