ԱՄՆ-ում ռեցեսիայի հավանականությունը 2012 թ. կգերազանցի 50%-ը: Այսպիսի գնահատական է տրվել Սան Ֆրանցիսկոյի դաշնային պահուստային բանկի զեկույցում:
Ինչպես հաղորդում է Reuters գործակալությունը, չնայած ԱՄՆ-ում տնտեսական աճի համար ներքին վտանգները սահմանափակ են, եվրոպական պարտքային ճգնաժամի հետ կապված ցնցումը կարող է վտանգել ԱՄՆ-ի՝ առանց այդ էլ փխրուն տնտեսությունը:
Վերլուծաբանները կարծում են, որ Եվրոպայի պարտքային ճգնաժամի լուծումը հեռու է, չնայած Հունաստանից և Իտալիայից եկող լուրերից ներդրողների ոգևորությանը:
Հունաստանում նոյեմբերի 11-ին կազմավորվեց ժամանակավոր կոալիցիոն կառավարություն՝ Եվրոպական Կենտրոնական բանկի նախկին փոխտնօրեն Լուկաս Պապադիմոսի գլխավորությամբ:
Իսկ Իտալիայի խորհրդարանը նոյեմբերի 13-ին հաստատեց կոշտ տնտեսական քաղաքականության շուրջ օրենքը, որը նախատեսում է բարձրացնել թոշակային տարիքը, բենզինի գները և կրճատել պետական ծախսերը: Դրանից հետո հրաժարական տվեց վարչապետ Սիլվիո Բեռլուսկոնին, և նրան փոխարիեց նախկին եվրահանձնակատար Մարիո Մոնտին:
«Եվրոպական պարտքային ճգնաժամը կարող է կործանել ԱՄՆ տնտեսությունը»,- ենթադրում են Սան Ֆրանցիսկոյի Դաշնային պահուստային բանկի մասնագետները:
Վերլուծաբանների կարծիքով՝ առայժմ դժվար է գնահատել ԱՄՆ-ի ենթադրվող ռեցեսիայի ծավալները, սակայն դրա հավանականությունը առավել մեծ կլինի 2012 թ. առաջին կեսին, իսկ հետո կնվազի:
