Ադրբեջանական APA լրատվական գործակալության փոխանցմամբ՝ Ադրբեջանը հայտարարել է չին-պակիստանյան համատեղ արտադրության JF-17 Thunder մարտական ինքնաթիռներ գնելու իր մտադրության մասին։ Այս մասին հայտարարել է Pakistan Aeronautical Complex-PAC ընկերությունը, որը մասնակցում է Dubai Airshow-2011 ավիաշոուին։
Այդ ավիաշոուի ընթացքում իրականացվել են JF-17 Thunder-ի ցուցադրական թռիչքներ, որոնց հետևել են ադրբեջանական պատվիրակության անդամները։ Պակիստանյան ընկերության ներկայացուցիչները նշել են, որ իրենք դրանց շուրջ բանակցել են Ադրբեջանի հետ, սակայն բանը դեռ չի հասել առքուվաճառքին։
Ներկայումս պակիստանյան ընկերությունը զբաղված է իր երկրի ռազմաօդային ուժերի պատվերների կատարմամբ, իսկ Ադրբեջանի համար պատվերներ կարող է իրականացնել մի քանի տարում։ Կողմերը նախնականորեն պայմանավորվել են մարտական ինքնաթիռների առաքման ծավալի շուրջ։
Նշվում է, որ մի շարք ցուցանիշներով JF-17 Thunder-ը նման է МиГ-29-ին։ Բարձր մանևրայնություն ունեցող JF-17 Thunder ինքնաթիռները կնպաստեն Ադրբեջանի ռազմաօդային ուժերի մարտունակության բարձրացմանը։ JF-17 Thunder-ի երկարությունը կազմում է 14.97 մետր, առավելագույն քաշը՝ 12.474 կիլոգրամ, առավելագույն արագությունը՝ 1909 կմ/ժամ, մարտի շառավիղը՝ 1352 կիլոմետր։
Այն զինված է 23 միլիմետր տրամաչափի Tipe 23-2 տիպի երկփող հրանոթով, «օդ-օդ» տիպի 4 ղեկավարվող հրթիռներով, «օդ-երկիր» տիպի 1 ղեկավարվող հրթիռով, 1 չղեկավարվող հրթիռով, Мк.82 տիպի 4 ավիառումբերով, Мк.84 տիպի 1 ավիառումբով։
