Ադրբեջանական Vesti.az-ը, վկայակոչելով ամերիկյան հեղինակավոր FOX 11 հեռուստաալիքին, հայտնում է, որ Թեհրանը պատրաստվում էր Ադրբեջանի նախագահ Իլհամ Ալիևի գահընկեցությանն ու Թուրքիայի արտգործնախարար Ահմեդ Դավութօղլուի սպանությանը։ Սակայն դավադրությունները բացահայտվել են ամերիկյան հետաքննությունների դաշնային բյուրոյի (FBI) կողմից.
«2012 թվականի համար Իրանն Ադրբեջանում պլանավորել էր երկու հնչեղ ահաբեկչական ակտեր և մեկ քաղաքական սպանություն։ Այդ ամենն ադրբեջանական բնակչության շրջանում պետք է առաջացներ աժիոտաժ, խուճապ և այլ բացասական հետևանքներ։
Այդ ահաբեկչական ակտերը պետք է զանգվածային անկարգությունների ու դժգոհությունների սկսվելու համար յուրօրինակ ելակետի դեր կատարեին։ Ադրբեջանում տիրող կայունությունը պետք է խախտվեր։ Եթե այդ պլաններն իրագործվեին, ապա երկրի ղեկավարը կկորցներ իր հեղինակությունն ու հրաժարական կտար։
Այդ քաղաքական սպանությունները պատվիրել էին այաթոլլա Ալի Խամենեիի մերձավորները։ Իրանական իշխանությունները վստահ են, որ Իսրայելն Ադրբեջանի աջակցությամբ հետախուզական տվյալներ է հավաքում Իրանի դեմ։ Գաղտնիք չէ, որ Ադրբեջանում պլանավորված քաղաքական սպանություններից հետո Ւրանն ադրբեջանական «եղբայրներին» կոչ էր անելու տապալել գործող իշխանություններին։
Այդ գործընթացը պետք է մեկնարկեր Թավրիզում, ուր տեղի ադրբեջանցիները պետք է զանգվածային բողոքի ակցիաներ կազմակերպեին Ադրբեջանի գլխավոր հյուպատոսության շինության առջև։ Իրանի հոգևոր առաջնորդ Ալի Խամենեին այս ամենը որակել է որպես հնարանք, որի նպատակն Իրանին իր հարևան երկրների հետ թշնամացնելն է։
Նշվում է, որ, Ադրբեջանից բացի, Իրանը մի շարք քաղաքական սպանություններ էր պլանավորել նաև Սաուդյան Արաբիայում, Սիրիայում, Թուրքիայում և Իրաքում։ Մարտ ամսին Թուրքիայում պետք է մահափորձ իրականացվեր Թուրքիայի արտգործնախարար Ահմեդ Դավութօղլուի դեմ»։
Ամերիկյան հեռուստաալիքը նշել է, որ նոր մանրամասներ է ներկայացնելու Թուրքիայում Իրանի ծրագրած քաղաքական սպանությունների շարքից։
