«Ժողովուրդ» օրաթերթից «Առաջին լրատվական»-ին տեղեկացնում են, որ վաղը` ժամը 11:00-ին, Կենտրոն և Նորք Մարաշ համայնքների ընդհանուր իրավասության դատարանում (դատավոր Ռուբեն Ափինյանի նախագահությամբ) կլսվի ՀՀ-ում ֆիզիկական առողջության պաշտպանման կենտրոնի տնօրեն, ՀՀ պաշտպանության նախարարի խորհրդական, ՀՀ նախագահ Սերժ Սարգսյանի մտերիմ ընկեր Բենիկ Հարությունյանի հայցն ընդդեմ «Ժողովուրդ» օրաթերթի:
«Ժողովուրդ»-ը սեպտեմբերի 9-ի համարում (N151) հրապարակել էր «Դոկտոր պրոֆեսորի արկածները ոսկու հանքերում» վերտառությամբ հոդված, որտեղ ներկայացրել էր ԱՄՆ քաղաքացի Նունե Սերոբյանի և իր գործընկերոջ` Արմեն Ասրյանի խոսքերը, որոնք պատմել են, թե ինչպես է Հարությունյանը իրենցից վերցրել 294 հազար ԱՄՆ դոլար ու չի վերադարձնում:
Թեև հրապարակման մեջ ներկայացված է նաև Բ. Հարությունյանի և իր փաստաբանի խոսքը, այնուամենայնիվ, ՀՀ ՊՆ խորհրդականը որոշել է վիրավորվել «Ժողովուրդ» օրաթերթից` պահանջելով 2.2 միլիոն դրամ:
«Ժողովուրդ»-ի դեմ ներկայացված մյուս հայցի քննությունը տեղի կունենա նոյեմբերի 17-ին` ժամը 14:00-ին Գավառ քաղաքում:
Գեղարքունիքի մարզի ընդհանուր իրավասության դատարան ներկայացրած հայցով էլ Գեղարքունիքի մարզպետ, ԲՀԿ-ական Նվեր Պողոսյանը 2,5 մլն դրամ է պահանջում օրաթերթից:
Նա էլ վիրավորվել է, որ «Ժողովուրդ»-ը հրապարակել է Գեղարքունիքի մարզի Թթուջուր գյուղի դպրոցի ուսուցչի քննության մասնակից Աննա Թորոսյանի խոսքերը այն մասին, որ մարզպետը 3 հազար ԱՄՆ դոլար կաշառ է վերցրել` իր մրցակցի հաղթանակն ապահովելու համար:
