«Եթե խոշոր խնդիրներ առաջանան Եվրոպայում, բնականաբար, դա կազդի համաշխարհային տնտեսության վրա, և նմանատիպ մտահոգությունները արտահայտված են նաև բյուջեում: Մտահոգության առկա լինելը չի նշանակում երևույթի ռիսկայնություն: Մյուս տարի եթե լինեն եվրոպական երկրներից եկող կատակլիզմներ, եթե գյուղատնտեսությունը էական կլիմայական պայմանների փոփոխության դեպքում ունենա կատաստրոֆիկ փոփոխություններ, բնականաբար, կարող են լինել որոշակի խնդիրներ: Այլ հավասար պայմանների դեպքում բյուջեն իրատեսական է, և եկամուտները կհավաքագրվեն՝ ինչպես նախատեսված է»,- այսօր լրագրողների հետ հանդիպման ժամանակ հայտարարեց ՀՀ ֆինանսների նախարար Վաչե Գաբրիելյանը:
Որպես նախկին ԿԲ ներկայացուցիչ և ֆինանսների ներկա նախարար՝ Վ. Գաբրիելյանը հայտարարեց, որ բանկային համակագը հարկերից ազատված չէ: Բանկային համակարգում ընդամենը 1 տեսակի հարկ չի կիրառվում՝ ԱԱՀ, որը ՀՀ յուրահատկություն չէ: Նախարարի խոսքով՝ ԱԱՀ-ով հարկվում են որոշ գործառնություններ, չեն հարկվում ֆինանսական գործառնությունները, քանի որ դա բերում է լրացուցիչ բարդ, խիստ ծախսատար վարչարարության, որն անմիջապես տանում է վարկային ռեսուրսների խստացման:
«Գյուղատնտեսության ոլորտում ստվերը դժվար է գնահատել. ինչպես ՀՀ-ում, այնպես էլ աշխարհի երկրների մեծամանությունում, գյուղատնտեսությունում դժվար է գնահատական տալ, որովհետև որոշակի ծառայություններ կարող են լրահաշվառվել, չհաշվառվել և այլն»,- նշեց Վ. Գաբրիելյանը՝ փաստելով, որ ստվեր ունենք տնտեսության բազմաթիվ այլ ոլորտներում ևս:
Վ. Գաբրիելյանի խոսքով՝ 90 հազ. դոլար և ավելի արժողությամբ մի քանի հազար մեքենա կա ՀՀ-ում, և, նախնական գնահատականներով, պետք է գոնե 1 մլրդ կամ մի քիչ ավելի եկամուտ գա:
Պատասխանելով «Առաջին լրատվական»-ի հարցին, թե արդյոք բավարար համարո՞ւմ է նախարարը Ընդերքի մասին օրենսգրքի փոփոխությունների արդյունքում հարկային մուտքերի սպասվելիք ավելացումը, Վ. Գաբրիելյանը նշեց. «Մեր գնահատականներով՝ 2010-ի նկատմամբ 2.5 մլրդ դրամի չափով ավելացում պետք է լինի: Մեր դրած ռեժիմն անցել է միջազգային փորձագիտական գնահատականներ: Կարելի է շատ ավելի շատ հարկել, բնականաբար, եթե լինեն այլ պայմաններ, և նայած թե որ միջազգային գների որ ժամանակահատվածի համար ենք նայել: 2011-ի համար նայելիս կփոխվի: Մենք բավարար ենք համարում այդ հարկումը, քանի որ պետք է այնպիսի ռեժիմ սահմանեինք, որը միաժամանակ վերցնում էր ընդերքի օգտագործման արդարացի վճար տնտեսվարողներից, և միևնույն ժամանակ խրախուսում էր, որ տնտեսավորղները գան և օգտագործեն ռեսուրսները: Դա բավարար մեխանիզմ է»:
