Քիմիական ստերջացումը չի կարող վերացնել մանկապիղծների սեռական հակվածությունը: «Առաջին լրատվական»-ի հետ զրույցում նման տեսակետ հայտնեց հոգեբանական գիտությունների թեկնածու, դոցենտ, «ԱՅԳ» հոգեբանական ծառայությունների կենտրոնի գլխավոր մասնագետ Ռուբեն Պողոսյանը` խոսելով մանկապղծության և մանկապիղծների նկատմամբ հարկադրանքի միջոցով քիմիական ստերջացում կիրառելու հետևանքների մասին: Ըստ նրա` դա կարելի է համեմատել գողի վերադաստիարակման հետ: «Եթե գողին վերադաստիարակեն, բայց հարմար պահ լինի գողություն անելու համար, նա դա կանի»,- օրինակով պարզաբանեց Ռ. Պողոսյանը` ընդգծելով, որ ցանկությունը երբեմն անձից կախված չէ:
Սակայն հոգեբանը համոզված է, որ մանկապիղծները պետք է համապատասխան պատիժ կրեն, որպեսզի մարդիկ կարողանան վստահ լինել, որ դպրոցում և այլ հասարակական վայրերում իրենց երեխաները չեն ենթարկվի բռնության: Ըստ հոգեբանի` մանկապղծությունը, հերոնտոֆիլիան շեղումներ են, որոնք արգելված են և դատապարտելի: «Այս պատճառով պետք է լինեն հստակորեն ընդգծված պատժամիջոցներ նրանց նկատմամբ, սակայն նրանց պետք է նաև հոգեբանական բուժում»,- նշեց Ռ. Պողոսյանը` կասկածելով նույնիսկ, թե բուժումն արդյուավետ կլինի:
Այն հարցին, թե եղել է նման պրակտիկա, երբ մանկապիղծ է բուժվել, ասաց, որ նման պրակտիկա չի եղել, որ մանկապիղծ բուժվի, սակայն ազատազրկելուն զուգահեռ, պետք է պարտադիր բուժում անցկացնել: Նշենք, որ նոր օրենքի նախագծով նախատեսվում է ստերջացման ենթարկել սեռական բնույթի հանցանք կատարած անձանց: