Իրանում գտնվող Սուրբ Ստեփանոս Նախավկայի հայկական վանքի զանգակատան վերանորոգման աշխատանքները ավարտվել են։
Ինչպես Թեհրանից «Ազատություն» ռադիոկայանին տեղեկացրել է իրանահայ լրագրող Վարդան Դավթյանը, երկարատև լռությունից հետո նոյեմբերի 6-ին ղողանջել են պատմական վանքի զանգերն ու օրհնվել է զանգակատունը։
8-րդ դարի հայ ճարտարապետական կառույցը Իրանի Արևելյան Ատրպատական նահանգում է` Ջուլֆա քաղաքից 12 կիլոմետր հեռավորության վրա` Արաքս գետի հարավային ափին գտնվող այժմ լքված Դարաշամբ գյուղի մոտակայքում։
Վանական այս համալիրը 2008թ. գրանցվել է ՅՈՒՆԵՍԿՕ-ի համաշխարհային ժառանգության ցանկում։
Իրանահայ լրագրողը նշում է, որ տարիներ փորձեր էին կատարվում կիսավեր զանգակատունը վերականգնելու համար, սակայն ապարդյուն։
Փորձագետները հանգել են այն եզրակացության, որ անհրաժեշտ է օգտվել Հայաստանի ճարտարապետների մեծ փորձառությունից ու վարպետությունից։
Հայաստանից հրավիրվել են այս բնագավառում հսկայական փորձ և վարպետություն ունեցող՝ վերանորոգող ճարտարապետ Ամիրա Բադիշյանն ու իր գործընկեր Տիգրան Թանամյանը։
Երկու վարպետների աշխատանքների շնորհիվ չորս ամիսում ավարտվել է այս ծավալուն ու դժվարին աշխատանքը։
Սուրբ Ստեփանոս Նախավկայի վանքի զանգակատան վերանորոգման աշխատանքը կատարվել է Իրանի մշակութային ժառանգության կազմակերպության «Իրանի պատմական եկեղեցիների կենտրոնի» պատասխանատու տնօրեն, ճարտարապետ Շերլի Ավետյանի հսկողության ներքո։
Ֆինանսական ծախսերը հոգացել են նշված կազմակերպությունը և «Արաքսի առևտրական ազատ գոտու» տնօրինությունը։
