Այսօր «Ա1+» հեռուստաընկերությունը ՀՌԱՀ հայտ է ներկայացրել հեռուստածրագրերի եթերային հեռարձակում իրականացնելու մրցույթին մասնակցելու նպատակով: Հարցին` ինչպես է պատկերացնում 12 անգամ մասնակցելու եւ չշահելու դեպքում հաղթելու հավանականությունը, «Ա1+»-ի հիմանդիր, «Մելտեքս» ընկերության ղեկավար Մեսրոպ Մովսեսյանը նշել է, որ իշխանությունը պետք է այս ընթացքում գոնե մի քիչ խելք հավաքի, քանի որ Հայաստանը առանց այդ էլ շատ խնդիրներ ունի, եւ եթե «Ա1+»-ի հարցն էլ մնա, իշխանության համար մեծ խնդիր է լինելու:
«Կարծում եմ` մոտեցումները մի քիչ այլ կլինեն, քան Ռոբերտ Քոչարյանի օրոք էր, որը, իհարկե, հիվանդագին վերաբերմունք ուներ «Ա1+»-ի նկատմամբ»,-նշել է Մեսրոպ Մովսեսյանը: Իսկ հարցին` իշխանությունների համար է հենց վտանգ «Ա1+»-ի գոյությունը, պատասախանել է, որ իշխանությունների վտանգն իրենց մեջ է, ոչ թե «Ա1+»-ի մեջ. «Ա1+»-ը այն հայելին է, որն արտացոլում է մեր կյանքը, «եթե կա ինչ-որ պրոբլեմ, եկեք ման գանք ոչ թե «Ա1+»-ի մեջ, այլ հենց պրոբլեմ սարքողի մեջ»,- ասել է Մեսրոպ Մովսեսյանը: