«ՀՀ կառավարությունը ձախողել է հռչակված հակաճգնաժամային ծրագիրը, կոալիցիոն հուշագրում ամրագրված 22 առաջնահերթություններն ապահովող, իր գործունեության, ՀՀ նախագահի նախընտրական ինչպես նաև կայուն զարգացման ծրագրերի սոցիալ տնտեսական նպատակադրումները»,- ասված է օրերս ՀՅ Դաշնակցության կողմից տպագրված գրքույկում, որը վերաբերում է կառավարության վարած սոցիալ-տնտեսական քաղաքականությանն ու 2011թ. Պետական բյուջեին: «Հայաստանի տնտեսությունում խաթարված է մակրոտնտեսական կայունությունը: Անկայուն իրավիճակը պատճառահետևանքային կապով կապված է գնաճի զսպման անարդյունավետ համակարգի, չկայացած ֆինանսական շուկաների, ներքին և արտաքին մրցուբակությունը սահմանափակող վճարային հաշվեկշռի, մուտքի արհեստական սահմանափակումներ ունեցող շուկաների և կարծրացած` ոչ մրցակցային իրադրության, ստվերային տնտեսության և կոռուպցիայի չափազանց բարձր աստիճանի, ինչպես նաև պետության սոցիալ տնտեսական գործառույթների խեղաթյուրումների հետ»,- նշված է գրքույկում:
