«Չենք լռելու» նախաձեռնությունից «Առաջին լրատվական»-ին ուրախությամբ հայտնում են, որ Թռչկանի ջրվեժի փրկությունը եկավ ապացուցելու, որ Հայաստանում քաղաքացիական հասարակությունը ունակ է իշխանություններից պահանջել իրեն հուզող խնդիրների լուծումը: Եվ դա ի վիճակի է անել միայն այն դեպքում, երբ չափազանց հստակ է ձևակերպում իր ասելիքը և ներկայացնում է համախումբ հասարակական պահանջ:
Նախաձեռնությունը կարևորում է քաղաքացիական պահանջների ճիշտ ձևակերպումը` ընդգծելով, որ ոչ մի իշխանություն չի կարող անտեսել հասարակության համախումբ պահանջը:
«Նա կարող է ցրել հետընտրական հանրահավաքը, սակայն ոչինչ չի կարող անել, երբ փողոց են դուրս գալիս քաղաքականապես ոչ հայտնի մարդիկ և պահանջում, որպեսզի երաշխավորվեն իրենց իրավունքները»,- համոզված է «Չենք լռելու»-ն` զարմանք հայտնելով, թե երբեմն մեր հասարակության իներտությունը ուղղակի ապշեցնող է:
«Ինչո՞ւ էին անցյալ տարի բոլորը իրենց խոհանոցներում վրդովվում օտարալեու դպրոցների բացման կապակցությամբ, երբ միայն 100 հոգի գիշերուզօր պայքարի մեջ էր: Ով լռում է, բողոքելու իրավունք չունի: Լուռումունջ վրդովմունքը կեղծ է և ծիծաղելի»,- նշված է նախաձեռնության հաղորդագրության մեջ:
