«Հասարակ քաղաքացու համար միանշանակ դրական հետևանքներ է ունենալու, որովհետև սոցիալական բավականին լուրջ ծախսերի ավելացում է նախատեսվում»,- 2012 թ. բյուջեն 101 միլիարդով ավելացնելու վերաբերյալ կարծիք հայտնեց ԱԺ ՀՀԿ խմբակցության պատգամավոր Արտակ Դավթյանը:
Նա նկատեց, որ այդ 101 միլիարդը բավականին մեծ սեգմենտներից է կազմված. «Պատկերացրեք, որ գնաճը իջեցվում է մինչև 4 +-1,5 նորմատիվային մեծության, բյուջեի դեֆիցիտը իջեցվում է մինչև 3,1 տոկոս: Այսինքն՝ նախաճգնաժամային ժամանակահատվածին հարիր պատկեր է ստացվում»:
Դավթյանը նկատեց, որ այս ցուցանիշները ցույց են տալիս, որ ինչպես վարչապետն է ասում` 2012-ին կայունությունից անցում ենք կատարելու տնտեսական աճի:
«Այն ամենը, ինչ նախատեսվում է՝ դա լավագույն ցանկություններն են, բայց ապահովել նման աճ, այն պայմաններում, երբ տնտեսական ճգնաժամի երկրորդ ալիքն է սկսվում, անհնարին է: Կարող է, ինչպես միշտ, ցանկություն ունենանք, բայց ինչպես նախորդ անգամ՝ 15 տոկոս անկում ունենանք»,- կարծիք հայտնեց «Նոր ժամանակներ» կուսակցության ղեկավար Արամ Կարապետյանը: Նա նշեց, որ փորձը ցույց է տալիս, որ հարկերի ավելացումը Հայաստանում վերջիվերջո բերում է ժողովրդի վիճակի վատթարացման:
Ներքաղաքական զարգացումների և սպասվող նախընտրական շրջանի մասին խոսելով, ՆԺԿ առաջնորդը նկատեց, որ, ինչպես որ սպասելի էր, աշունն այդքան էլ թեժ չեղավ և թեժ էլ չի լինելու: Նրա գնահատմամբ՝ իրավիճակը կարող է թեժանալ զուտ միայն տնտեսա-սոցիալական հողի վրա, քանզի սկսվում է ձմեռը: «Մեր ուժը ինքնուրույն շարունակում է իր գործունեությունը, հիմա բանակցություններ որևէ ուժի հետ չենք վարում, որովհետև Հայաստանում փաստացիորեն ուժեր, որոնք գտնվում են երեք նախագահների եռանկյունուց դուրս, չկան»,- ասաց Արամ Կարապետյանը:
Արտակ Դավթյանն էլ նշեց, որ քաղաքական գործընթացներն ընթանում են բնականոն հունով. «Շատ լավ է, որ ամենամարտական ընդդիմությունն ինքն է հայտարարում առաջիկա համապետական ընտրություններին մասնակցելու մասին»:
