ԱՄՆ Հետաքննությունների դաշնային բյուրոն հրապարակել է ռուս լրտեսներին հետևելու տեսագրությունները: Նկարահանումներն իրականացվել են 10 տարի շարունակ: Արդյունքում 2010 թ. հունիսին ԱՄՆ տարբեր քաղաքներում ձերբակալվեցին 10 ռուս լրտեսներ, որոնք 2010 թ. հուլիսի 9-ին փոխանակվեցին Ռուսաստանում լրտեսական գործողությունների համար դատապարտված ամերիկացիների հետ: Ռուսական լրտեսական ցանցի առանցքային դեմքերից էր 29-ամյա Աննա Չապմանը, որը, վերադառնալով Ռուսաստան, դարձավ հեռուստաշոուի հաղորդավարուհի:
Ինչպես հաղորդում է CNN-ը, երկուշաբթի ամերիկյան ԶԼՄ-ների պահանջով այդ տեսագրություները փոխանցվել են նրանց` համաձայն ազատ տեղեկության մասին օրենքի:
FBI-ը ռուս լրտեսների մոնիտորինգի գործողություններին տվել է «Ուրվականների պատմություն» անվանումը: Լրտեսները պետք է ԱՄՆ-ում հաստատվեին այլ անուններով և փորձեին ներքաշվել ամերիկյան քաղաքական շրջանակների մեջ:
FBI-ի նկարած տեսանյութերում երևում է, թե ինչպես են լրտեսները հասարակական վայրում փողով փաստաթղթեր փոխանակում` անգամ չկասկածելով, որ իրենց հետևում են:
ԱՄՆ իշխանությունները նշում են, որ ռուս լրտեսներին այդպես էլ չի հաջողվել որևէ գաղտի տեղեկություն ստանալ:
