Մարդու իրավունքների պաշտպանի գրասենյակը, համագործակցելով Հայաստանում գործող 9 հասարակական կազմակերպությունների հետ, նոյեմբերի 1-ից վերաբացում է իր արագ արձագանքման ծառայությունը: ՄԻՊ գրասենյակին աջակցում են «Հայաստանի մանկական ասոցիացիա», «Համագործակցություն հանուն ժողովրդավարության կենտրոն», «Քաղաքացիական հասարակության ինստիտուտ», «Մարդու իրավունքների քաղաքականության և հումանիտար պրոբլեմների միջազգային ասոցիացիա», «Սոցիալական արդարություն», «Ընդդեմ իրավական կամայականությունների», «Լրագրողներն հանուն մարդու իրավունքների» հասարակական կազմակերպությունները, որոնց ներկայացուցիչներն այսօր լրագրողների հետ հանդիպման ժամանակ հույս հայտնեցին, որ իրենց և ՄԻՊ գրասենյակի համագործակցությունն արդյունավետ կլինի:
«Լրագրողներն հանուն մարդու իրավունքների» ՀԿ ղեկավար Ժաննա Ալեքսանյանը նկատեց, որ օմբուդսմենի գրասենյակը պետք է առաջինը արձագանքի բանակում տեղի ունեցող բռնություններին, և թեժ գծի առկայությունը միայն կաջակցի դրան:
«Սոցիալական արդարություն» ՀԿ ղեկավար Արշակ Գասպարյանն էլ այդ գործում կարևորեց թիմային աշխատանքը՝ նշելով, որ այն ուղղված կլինի հանուն քաղաքացիական հասարակության շահերի պաշտպանության:
«Ընդդեմ իրավական կամայականությունների» ՀԿ ղեկավար Ժորժետա Մեսրոպյանն էլ շեշտեց, որ միայնակ պայքարելը մարդու իրավունքների խախտումների դեպքերի դեմ դժվար է, և ՄԻՊ գրասենյակի աջակցությունը ՀԿ-ների գործունեությունն էլ ավելի կհեշտացնի:
«Քաղաքացիական հասարակության ինստիտուտ» ՀԿ ներկայացուցիչ Արման Դանիելյանն էլ նկատեց, որ բռնություններ ասելով՝ միանգամից պատկերացնում ենք բանակն ու ոստիկանությունը, և հույս հայտնեց, որ թեժ գծի առկայությունն ու ՀԿ-ներ-ՄԻՊ գրասենյակ համագործակցությունը հնարավորություն կտան հայտնաբերել դրանցում տեղի ունեցած բռնությունները և կանխարգելել դրանք:
Մարդու իրավունքների պաշտպան Կարեն Անդրեասյանն էլ, ամփոփելով ՀԿ-ի ներկայացուցիչների ակնկալիքները, նշեց. «Մինչ մենք խոսում ենք ակնկալիքների մասին, երեկ էլի զինվոր է մահացել, և պետք է այնպես անել, որ այդ ակնկալիքները գործի վերածվեն»:
Բանակում հեռախոսի բացակայության պայմաններում թեժ գծին զանգելու դժվարությունների մասին խոսելով՝ Կ. Անդրեասյանը նկատեց, որ դա իրոք խնդիր է, սակայն այդ պարագայում իրենք կազմակերպելու են հաճախակի այցելություններ զինված ուժերի տարբեր ստորաբաժանումներ և այդ կերպ են փորձելու համագործակցել զինծառայողների հետ. «ՄԻՊ ներկայացուցիչն անարգել կարող է մուտք գործել զինված ուժեր, իսկ ՀԿ-ներն ունեն հասարակական վստահություն` հուսով ենք, մեր իշխանության և նրանց վստահության համադրումը կօգնի առավել հեշտացնել մեր գործունեությունը»:
Կ. Անդրեասյանը նաև տեղեկացրեց, որ արագ արձագանքման ծառայության ստեղծման համար բյուջեի ավելացում չի եղել, և ՄԻՊ գրասենյակը, այլ բաժնի որոշակի հաստիքներ կրճատելով, փորձել է 4-5 հաստիք հատկացնել այդ ծառայությանը, ինչպես նաև մեծ աջակցություն է ստացել վերոնշյալ ՀԿ-ների կողմից: