Նոյեմբերի 1-ի առավոտյան 9-00-ից 24 ժամ շարունակ յուրաքանչյուր քաղաքացի կարող է զանգահարել 116 անվճար թեժ գծին, եթե խոչընդոտվել է նրա իրավունքների իրացումը, եթե անհիմն բերման է ենթարկվել իրավապահ մարմինների կողմից, այնտեղ ենթարկվել է դաժան, անմարդկային արժանապատվությունը նվաստացնող վերաբերմունքի, կամ առկա է այդպիս վերաբերմունքի արժանանալու սպառնալիք` վարույթն իրականացնող մարմնի կողմից: Այսօր այս մասին տեղեկացրեց ՄԻՊ Կարեն Անդրեասյանը` վերաբացելով Մարդու իրավունքների պաշտպանի գրասենյակի արագ արձագանքման ծառայությունը:
Հիշեցնենք, որ իր պաշտոնավարման առաջին իսկ օրից Անդրեասյանը դադարեցրել էր արագ արձագանքման ծառայության գործունեությունը` պատճառաբանելով որ այն չի ծառայել իր նպատակին, քանզի չունի անհրաժեշտ ռեսուսրներ իրեն նախատեսված գործունեություն իրականցնելու համար: Այսօր Անդրեասյանը տեղեկացրեց, որ շնորհիվ 9 հասարակական կազմակերպությունների հետ համագործակցության՝ ՄԻՊ գրասենյակը նոյեմբերի 1-ից վերաբացում է արագ արձագանքման ծառայությունը և հուսով է, որ այն կծառայի իր նպատակին: 116 թեժ գծին զանգահարելու դեպքում քաղաքացիները կարող են ստանալ անհրաժեշտ իրավական խորհրդատվություն, անհրաժեշտության դեպքում արագ արձագանքման խումբը կայցելի համապատասխան հաստատություն, որտեղ ոտնահարվել են մարդու իրավունքները, իսկ առանձին դեպքերում ահազանգի վերաբերյալ տեղեկությունը կփոխանցվի պետական մարմնին կամ կիրականցվի տեղեկատվության ճշգրտում:
Անդրեասյանը տեղեկացրեց, որ արագ արձագանքման ծառայության գործունեության համար նախատեսված է երկամսյա փորձաշրջան, որից հետո էլ կընդլայնվի նրա գործունեության շրջանակը: