Մայքլ Ջեքսոնը կարող էր մահանալուց առաջ իր անձնական բժշկից` սրտաբան Կոնրադ Մյուրեյից, գաղտնի ընդունել հանգստացող դեղամիջոցը:
Հիշեցնենք, որ բժշկին ներկայում մեղադրում են փոփ-արքայի չկանխամտածված սպանության մեջ:
Այս մասին հայտնում է РИА Новости գործակալությունը` հղում կատարելով Associated Press-ին: Ըստ գործակալության` այսպիսի կարծիք է հայտնել պաշտպանող կողմի վկան` դոկտոր Փոլ Ուայթը` նախօրեին լոսանջելեսյան դատարանում հանդես գալով հայտարարությամբ:
Հետաքննող մարմնի վարկածի համաձայն`Մյուրեյն իր հանրաճանաչ հիվանդին տվել է պրոպոֆոլի չափազանց մեծ քանակություն, որն այլ դեղամիջոցների հետ մտնելով փոխազդեցության մեջ, դարձել է երաժիշտի մահվան պատճառ:
Դոկտոր Ուայթի խոսքով`փոփ-արքայի սենյակում ինքը չի տեսել այն բանի վկայություն, որ Մյուրեյը Ջեքսոնի մահից առաջ նրան ներերակային ցավազրկող է ներարկել կաթիլայինի միջոցով: Ամեն ինչ ավելի շուտ այն բանի մասին է վկայում, որ պրոպոֆոլն ընդունվել է ներարկման միջոցով:
Պաշտպանող կողմն, այսպիսով, վստահ է, որ երգիչն իրեն անձամբ է ներարկել մահացու չափաքանակով քնաբերը:
Գործակալության տեղեկություններով, ենթադրվում է, որ Փոլ Ուայթը Մյուրեյի գործով վերջին վկան է:
Անցած շաբաթ անեսթեզիոլոգ Շթիվեն Շեյֆերն «անհեթեթ» էր համարել Մյուրեյի պաշտպանության պնդումները` իբր երաժիշտն անձամբ է իրեն ներարկել քնաբերը, ինչի հետևանքով էլ մահացել է:
