ԱԺ ֆինանսավարկային և բյուջետային հարցերով մշտական հանձնաժողովի նախագահ ՀՀԿ-ական Գագիկ Մինասյանն «Առաջին լրատվական»-ի հետ զրույցում «շատ դրական» գնահատեց ազգային վիճակախաղ ներդնելու վերաբերյալ կառավարության որոշումը. «Շատ եվրոպական երկրներում ընդունված փորձ է: Կարծում եմ՝ մեզ մոտ դա դրական հետևանքներ կունենա: Մի կողմից շատ ավելի կազմակերպված կլինի, մյուս կողմից էլ պետական բյուջեի համալրում կունենանք»:
Մեր այն դիտարկմանը, որ լոտոն գայթակղություն է, որն ավելի շատ հրապուրում է միանգամից հարստանալու հույս փայփայող չունևոր խավին, և ժողովրդի սոցիալական վիճակը հաշվի առնելով՝ որքանո՞վ է նպատակահարմար հավելյալ գայթակղություն ստեղծելը, Գ.Մինասյանը պատասխանեց. «Ինչո՞ւմ է կայանում այդ գայթակղության լրացուցիչ մասը: Եթե կա մարդ, որ այդպիսի գայթակղության ցանկություն ունի, հիմա դրա հնարավորությունը կա՞»,- նշեց պատգամավորը՝ հավելելով, որ ՀՀ-ում այժմ էլ կան լոտոներ՝ ոչ պետական:
Գ.Մինասյանը չհամաձայնեց այն մտքի հետ, որ մի բան է պետական լոտոն, այլ բան՝ ոչ պետականը: Ըստ նրա՝ կշահեն այն մարդիկ, ովքեր սնվելու են բյուջեից, և իհարկե՝ այն մարդիկ, ովքեր օգտվելու են լոտոյի ծառայություններից, որովհետև այստեղ ամեն-ինչ շատ ավելի վերահսկելի կլինի. «Բայց չի լինի մի մարդ, որն այսօր չի ուզում խաղալ լոտո, իսկ վաղը, որ պետությունը ևս սկսի զբաղվել այդ բիզնեսով, ինքը ցանկություն ունենա: Այդպիսի բան հնարավոր չի»:
