ԼՂՀ նախկին արտգործնախարար Արման Մելիքյանը քիչ հավանական է համարում «Բարգավաճ Հայաստան» կուսակցության և ՀԱԿ-ի համագործակցության հնարավորությունը:
«Կասկածում եմ, որ համագործակցությունը կկայանա: Միաժամանակ՝ Ռուսաստանը կաջակցի, որ Հանրապետականը պահպանի իր դիրքերը: Եթե անգամ ԲՀԿ-ն դուրս գա կոալիցիայից, դա քաղաքական իրական վերադասավորումների չի հանգեցնի: Այս վիճակում ՀԱԿ-ը կարող է մտնել խորհրդարան, սակայն այժմ ընթանում է ՀԱԿ-ի դիրքերի թուլացման գործընթաց, և մինչև ընտրություններ նրա պոտենցիալը կնվազի: Եթե ամեն ինչ այսպես շարունակվի, նա խորհրդարան կմտնի մոտավորապես «Ժառանգության» թվաքանակով»,- ենթադրեց Մելիքյանը:
Նա նաև տեղեկացրեց, որ մասնակցելու է առաջիկա ընտրություններին:
Մելիքյանը նաև չբացառեց, որ Երևանի քաղաքապետի, իր խոսքով՝ կիրթ մտավորականի,
հնարավոր հրաժարականում դերակատարություն ունի նաև Ռուսաստանը:
Ամփոփելով`նախկին պաշտոնյան անդրադարձավ նաև
Ռուսաստանի վարչապետ Վլադիմիր Պուտինի առաջարկած Եվրասիական միության ստեղծման գաղափարին` նկատելով, որ դրանում շատ բան կախված կլինի այն տրամադրությունից, որը նախագծին կհաղորդի Պուտինը: «Եթե եվրասիական դաշինքը կազմավորվի պուտինյան առաջարկներով, Հայաստանի համար ամեն ինչ ավելի լավ և ավելի հեռանկարային կլինի: Իսկ եթե կառույցը ձևավորվի նազարբաևյան պլանով, թյուրքական գործոնի դերն այնտեղ մեծ կլինի, և չի բացառվում, որ մեծանա նաև Թուրքիայի դերակատարությունը»,- նշեց ԼՂՀ նախկին արտգործնախարարը:
Նշենք, որ Եվրասիական միության գաղափարն առաջարկել էր Ռուսաստանի գործող վարչապետ Վլադիմիր Պուտինը: Ըստ նախագծի` միության մեջ ներգրավված երկրները միասնական դրամական համակարգ պետք է ունենան և սերտորեն համագործակցեն միմյանց հետ:
Նշենք նաև, որ օրերս ՀԱԿ համակարգող Լևոն Զուրաբյանը չէր բացառել, որ իրենք կարող են համագործակցել ԲՀԿ-ի հետ, եթե նա «հրաժարվի իր անցյալից» և «ռեժիմի դեմ պայքարի ելնի»:
