ԱՄՆ պետքարտուղար Հիլարի Քլինթոնը BBC-ի իրանական ծառայությանը տված հարցազրույցում ասել է, որ Իրանի հետ երկխոսություն սկսելու ԱՄՆ փորձը հաջողությամբ չի պսակվել, քանի որ հստակ չէ, թե ով է Իրանում ղեկավարում:
Քլինթոնն իր մտահոգությունն է հայտնել Իրանի՝ զինվորական բռնապետության վերածվելու հարցի վերաբերյալ: Սակայն Թեհրանի հետ միջուկային զենքի շուրջ բանակցություններին ԱՄՆ-ը պատրաստ է:
Հիշատակելով 2009 թվականի ցույցերը՝ Քլինթոնը նշել է, որ սխալ է համարում իրանական ընդդիմության որոշումը միջազգային աջակցությունից հրաժարվելու վերաբերյալ:
Հիշեցնենք, որ ԱՄՆ պետքարտուղարի խոսքերով՝ Վաշինգտոնը պլանավորում է 2011 թվականի ավարտին Իրանում բացել «վիրտուալ դեսպանատուն», որպեսզի համացանցի միջոցով իրանցիներին տեղեկացնեն վիզաների և ուսումնական ծրագրերի մասին:
