Ադրբեջանական APA լրատվական գործակալության փոխանցմամբ՝ Վրաստանի ճգնաժամային հարցերի շուրջ և Հարավային Կովկասում ԵՄ-ի հատուկ ներկայացուցիչ Ֆիլիպ Լեֆորն այսօր Բաքվում տեղի ունեցած ճեպազրույցում անդրադարձել է Ղարաբաղյան հակամարտության կարգավորմանը.
«ԵՄ-ը աջակցում է Ղարաբաղյան հիմնախնդրի կարգավորմանն ուղղված ԵԱՀԿ Մինսկի խմբի ջանքերին։ Մենք համագործակցում ենք Մինսկի խմբի հետ և պատրաստ ենք կիսել հետհակամարտային և վերականգնողական փուլում Եվրոպայի ունեցած փորձը։
Ղարաբաղյան հակամարտության չկարգավորված մնալու գլխավոր պատճառը միմյանց չվստահելն է, հնարավոր է՝ նաև փոխադարձ վախը։ Համանախագահները հույս հայտնեցին, որ հակամարտող կողմերը փոխզիջման կգնան, և խնդիրը կլուծվի։ Ես այդ մասին հայտարարել եմ նաև Երևանում, և դա քննարկել եմ նախագահ Իլհամ Ալիևի հետ։
ԵՄ-ի արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը մեծ հետաքրքրություն է ցուցաբերում Հարավային Կովկասի հանդեպ, քանի որ այդ տարածաշրջանը օբյեկտիվ պատճառներով շատ կարևոր է ԵՄ-ի համար։
Լեհաստանում տեղի ունեցած «Արևելյան գործընկերության» գագաթնաժողովի շրջանակներում Էշթոնը հանդիպումներ ունեցավ Հարավային Կովկասի երեք երկրների նախագահների հետ։ Նա պլանավորել է այցելել տարածաշրջան, սակայն ստույգ ժամկետը հայտնի չէ»։
