Այսօր Դավիթ Համբարձումյանի անվան ջրացատկի դպրոցում թունավորման դեպքեր են գրանցվել: Մեր տեղեկություններով երեխաները, որոնք 5-8 տարեկան են, ծանր վիճակում տեղափոխվել են Երևանի տարբեր մանկական հիվանդանոցներ: Մեզ հետ զրույցում ջրացատկի դպրոցի ադմինիստրատորն ասաց, որ թունավորման դեպք չի գրանցվել, պարզապես քլորի պարունակությունը ջրում նորմայից բարձր է եղել (նորման 0,5 տոկոս), և երեխաներին անմիջապես ջրից դուրս են հանել:
Երևանի Մուրացան համալսարանական կլինիկական հիվանդանոցից մեզ հայտնեցին, որ այս պահին վնասվածքաբանական բաժանմունքում 4 երեխա կա: «Մենք ձեզ ավելի մանրամասն կասենք վաղն առավոտյան, իսկ երեխաների վիճակը կախված է անալիզներից, ներկա դրությամբ նրանց վիճակը գնահատվում է նորմային մոտ»,-ասաց վնասվածքաբան Նելլի Մարտիրոսյանը:
Ինչպես տեղեկացանք, ևս 5 երեխա գտնվում են 3-րդ մանկական հիվանդանոցի վերակենդանացման բաժանմունքում, որոնց վիճակը կայուն չէ: Մեզ հետ զրույցում վերակենդանացման բաժանմունքի աշխատակիցն ասաց, որ իրենց բաժնից բացի` երեխաներ կան նաև այլ բաժիններում:
