Քիչ առաջ ՀՀ ոստիկանության կենտրոնական բաժին է մուտք գործել այսօր առավոտյան ոստիկանություն բերման ենթարկված խաղաղ ցուցարար, ակտիվիստ Լալա Ասլիկյանի փաստաբան Ռոբերտ Ռևազյանը: Այս մասին «Առաջին լրատվական»-ին տեղեկացրեց ԱԺ «Ժառանգություն» խմբակցության պատգամավոր Զարուհի Փոստանջյանը` ընդգծելով, որ շուրջ 30 ոստիկաններ արգելում են այն մարդկանց մուտքը ոստիկանություն, ովքեր ցանկանում են որևէ տեղեկություն իմանալ «Բանակն իրականում» քաղաքացիական նախաձեռնության անդամի ազատ արձակման մասին:
Նշենք, որ այսօր առավոտյան կառավարության շենքի առջև պետք է տեղի ունենար «Բանակն իրականում» քաղաքացիական նախաձեռնության ակցիան, սակայն այն խոչընդոտվեց ոստիկանության աշխատակիցների կողմից, ովքեր վաղ առավոտից փակել էին շենք տանող բոլոր ճանապարհները: Քանի որ փակված էին բոլոր ճանապարհները, ցուցարարներն իրենց ակցիան շարունակեցին Հանրապետության հրապարակի շատրվանների մոտ: Ակցիայի ընթացքում իր կամքին հակառակ Կենտրոնի ոստիկանություն տեղափոխվեց ակտիվիստ Լալա Ասլիկյանը: «Միջադեպից հետո ցուցարարների մի մասը գնաց ոստիկանություն, մոտավորապես կես ժամ ԱԺ« Ժառանգություն» խմբակցության պատգամավորներ Ստեփան Սաֆարյանը և Զարուհի Փոստանջյանը Լալա Ասլիկյանի փաստաբանի հետ եղել են ոստիկանական բաժանմունքի մոտ, որից հետո քիչ առաջ փաստաբան Ռոբերտ Ռևազյանին ուղեկցել են ոստիկանություն»,- նշեց Զ. Փոստանջյանը:
Ըստ նրա` Լալա Ասլիկյանի ոստիկանություն բերման ենթարկելը մարդու իրավունքների կոպիտ ոտնահարում է: « Որևիցե իրավախախտում Լալա Ասլիկյանի կողմից թույլ չի տրվել, հակառակը՝ ոստիկանների կողմից է թույլ տրվել»,- ընդգծեց պատգամավորը:
Տեղեկացնենք, որ այժմ Երևան քաղաքի ոստիկանության Կենտրոնի բաժնի շենքի մոտ ցուցարարների մի մասը սպասում են որևէ լուրի, իսկ ոստիկանները շարունակում են վերահսկել ոստիկանության մուտքը: Այս պահին որևէ տեղեկություն չկա, թե երբ նորից ազատության մեջ կլինի ակտիվիստ Լալա Ասլիկյանը:
