Ոչ ալկոոհոլային խմիչքների խոշոր արտադրող Coca-Cola Company ընկերությունը նոյեմբերին կփոխի իր թիթեղյա տարաների գույնը` Վայրի բնության համաշխարհային հիմնադրամի հետ (WWF) համատեղ Արկտիկայի սպիտակ արջերի տեսակի պահպանման վրա ուշադրություն հրավիրելու համար: Այս մասին ասվում է ընկերության պաշտոնական կայքում:
Այժմ Coca-Cola-ի տարաները կդառնան ձյունաճերմակ, իսկ դրա ստորին մասում պատկերված կլինեն արծաթագույն և սպիտակ արջեր: Տարայի վրա միակ կարմիր պատկերը կմնա ընկերության տարբերանշանը: Ընդհանուր առմամբ, կթողարկվի 1.4 մլրդ տարա: Ընկերության մյուս ապրանքների (Sprite, Nestea, Minute Maid) դիզայնն այդքան կտրուկ փոփոխության չի ենթարկվի: Սպիտակ գույնով կներկվի միայն տարայի բացիչի հատվածը: Նոր դիզայնով գազավորված ըմպելիքները կարելի է ձեռք բերել արդեն նոյեմբերից:
Ընկերությունը հույս ունի, որ նոր դիզայնով կարող է մարդկանց ուշադրությունը հրավիրել սպիտակ արջերի տեսակի պահպանման խնդրի վրա: Այդ նպատակով Coca-Cola Company-ն WWF-ին կնվիրաբերի է 2 մլն դոլար: Եվս 1 մլն դոլար ընկերությունը նախատեսում է ստանալ իր սպառողների օգնությամբ, որոնց առաջարկում է տարայի կոդը 1 դոլար արժողությամբ կարճ հաղորդագրություն ուղարկել:
Բարեգործական արշավին աջակցելու համար ստեղծվել է ArcticHome.com կայքը, որտեղ նշվում է, թե որքան կարևոր է սպիտակ արջերի համար յուրաքանչյուրի ուղարկած հաղորդագրությունը:
Բացի տարաների ռեդիզայնից՝ Coca-Cola-ն և WWF-ն պատրաստվում են Warner Bros. և IMAX Corporation կինոընկերությունների հետ համատեղ նկարահանել «Դեպի Արկտիկա 3D» ֆիլմը, որը վարձույթում կհայտնվի 2012 թ.:
Աշխարհում, փորձագետների գնահատումներով, ապրում է շուրջ 21 հազար սպիտակ արջ: