ԱՄՆ գործող նախագահ Բարաք Օբաման պարտություն կկրի 2012թ. նախագահական ընտրություններում` հավաքելով ընտրողների ձայների 43.5%-ը: Դա նրա համար բավարար չի լինի` իր լիազորությունները ևս 4 տարով երկարացնելու համար: Սպիտակ տան գործող ղեկավարի համար այսպիսի ոչ սփոփիչ կանխատեսումներ է արել Յելի համալսարանի պրոֆեսոր Ռեյ Ֆեյրը՝ IHS Global Insight խորհրդատվական ընկերության կողմից մշակված մաթեմատիկական մոդելի օգնությամբ: Չի բացառվում, որ Օբամայի դեմ հաղթանակ տանի սևամորթ հանրապետական թեկնածու Հերման Քեյնը:
Ինչպես հաղորդում է РБК daily-ն, պրոֆեսոր Ֆեյրն իր ունիվերսալ բանաձևը ներկայացրել է 2002թ., և այդ ընթացքում դրա օգնությամբ վերլուծաբանները սովորել են կանխատեսել ընտրությունների ելքը: Հաշվարկների համար որպես հիմք վերցվում է թեկնածուի` իշխանության եղած վերջին տարիներին մակրոտնտեսական վիճակագրությունը: Մասնավորապես հաշվի է առնվում բնակչության իրական եկամուտների դինամիկան և գործազրկության մակարդակը: Այսպիսով, ԱՄՆ-ում ներկա իրավիճակը ակնհայտորեն Օբամային ոչ մի լավ բան չի խոստանում: Մասնագետների կարծիքով` 2012թ. նախագահական ընտրություններում ձայների 50%-ի սահմանը հաղթահարելու համար նա մինչև հաջորդ տարվա երրորդ քառորդը պետք է ապահովի 4% տնտեսական աճ և 7.5%-ով կրճատի գործազրկությունը, ինչը գործնականում անհնար է:
IHS-ի փորձագետները կարծում են, որ Օբամային կարող է օգնել միայն ամերիկացիների պայծառ հիշողությունը, քանի որ տնտեսական խնդիրները նա ժառանգություն է ստացել իր նախորդից` Ջորջ Բուշ Կրտսերից: Նրա օգտին կարող է գործել նաև հանրապետականների շրջանում ուժեղ և խարիզմատիկ թեկնածուի բացակայության հանգամանքը: Սակայն հանրապետականներն էլ իրենց խաղաքարտն ունեն` սևամորթ թեկնածու Հերման Քեյնը, որը գնալով ավելի մեծ ժողովրդականություն է վայելում: Դեռևս մի քանի ամիս առաջ նրա թեկնածությունը պաշտպանում էր Հանրապետական կուսակցության կողմնակիցների միայն 5%-ը, այսօր նրա օգտին պատրաստ է քվեարկել դեմոկրատների հակառակորդներից յուրաքանչյուր երրորդը:
Ինքը` Օբաման, ի վիճակի չլինելով հաջողության հասնել տնտեսական ճակատում, փորձում է լրացուցիչ միավորներ հավաքել գաղափարական ճակատում: Այստեղ նա, իհարկե, պարծենալու տեղ ունի: Օբամայի նախագահության տարիներին ոչնչացվել է ԱՄՆ գլխավոր թշնամին` Ուսամա բեն Լադենը և մեծ թվով այլ վտանգավոր ահաբեկիչներ, ամերիկացիներն օգնել են տապալել Մուամար Քադաֆիի վարչակարգը Լիբիայում, իսկ մինչև տարվա վերջ ամերիկյան զորքերն ամբողջությամբ դուրս կգան Իրաքից:
